spennich, vnachtsam, verthoinlich, vnerfaren, vnbehût
sticht sich offt jn vill gefhar mit springen klimmen
zancken, fechten, mit lichtfertigem verheischen vnd hand=
len, boser geselschafft, vngerathen heiligen, jst klein vor=
sigtigkeit bei jm synen schaden zû vorkommen, Das
menlich alter hat groisse sorg mohe vnd arbeit, moiß
vill vber landt vnd wasser reisen, jn kregen besatzung
vnd vff der wacht syn, mit groissem fleise tragten wie
er weib vnd kyndt ernere, Erlich haûß halte, den frûnden
vnd nachparen zu\o leiff vnd leide sich fynden laiß, das er
nit der geringste sie vnd veracht werde, synen standt mit
ehren erhalte, syn ampter, deinst, geschefft vnd beroiff
mit fleiß verrigte, Hab ich mich nûhe der drei fori=
ger alter nit mehe zû erfrewen jn dem waß sie lûst
forthelß vnd nûtz an sich haben, so hab ich mich jrer aûch
nit mehe zû betroben jn dem waß sie besweirniß sorg
vnd last vff jn haben, Dan kein dinck ist von forthel
es hat aûch syn vnforthell, vnd hynwidder, Der forige-
theil vnd alter bin ich ab, die dar jn syn mogen sich die
zû nûtz machen besser dan ich gethain, Hab ich mich dan
nit mehe da mit daß sie lûstich vnd {Tilgung: nicht lesbar} nûtzlich syn zû
bekommern, so kompt jre vnlust vnd last aûch nyt
mehe vff den rûcken, Myt eitzigem alter, mit myne-
alterthûmb mach ich mich so frolich machen alß ich kan,
jn dissem lesten alter mach mir aûch Gott helffen daß ich
das zûr selen heil vnd seligkeit moge also zû nûtz machen
waß jn den forigen versau\omet zu dissem vergûyttet
werde, wan das ende gu\ot ist so ists alles gûtt, Jst der
windter von wegen grûisser kelte abschewlich, so hatt
er dar gegen lange nachten vil rawe vnd rast vnd ander
forthel wie oben angezeigt, Jst der somer wol von wege-
der werme angeneim vnd wegen deß langen tags nûtzlich
so hat er dargegen vil vnforthels vol stetiger arbeit
vnd vnrawen hitzst, flohe, gewormß, weiche gifftige lufft
vnd vil vngemachs, Also ist es aûch zûm theill mit dem
Glenß vnd herbst gelegen, die beide syn auch nit ohn
reiff vngewetter vnd kranckheit, Jch hab auch jn jedem
alter daß folck hoeren weinen klagen vnd karmen, nit
so vil von den alten alß von denen jn den vorigem
alteren, fynden der vil gedûltich vnd der hoffnong daß
jr ellendt sich zum ende neiket, Aber damit nu\ohe die
obbestimpte ætates vnd alter mynem vorigen Gedenck=
boich jnûerleibt von mynen Sesszich jaren vermeldende
aûff myn person accommodeirt werden vnd eben kome-
mogten, so ist wol war das etliche mehe etliche weni=
ger grade vnd theill gemacht vnd dieselben auch wid=
der vndertheillt haben, Edoch so bedûnckt mich die fûnff
graede der alter da von oben aûsser dem Varrone ge=
saget sûllen am besten vnd eigentligsten vff myn per=
son scleissen, Disser regnet die kyndtheit biß zûm
fûnffzehen jare dan so lange vnd druber lesen vnd
schriben aûch myn grammaticalia jn Coln wie auch
zû Emerich geleirt, Da von biß zûm drissigsten jare
hab ich jn der Vniûersitet zû Coln jn artibus atque
legibus stûdeirt vnd dar jn promoûeirt dar zwischen
ich myn beide eltern samen bei leben gehat aber myne-
fatter hab ich darnach balde verloren Disse zit nennet er
|