Gedenckboich des alterthombs Hermanni von Weinsberch, mit kurtzer erholung der herkompst, und genealogien, auch continuerung sines vorigen lebens von jar zu jare biss an sin 60 jare, und wie es im selben allenthalben geschaffen, sampt etlichen clausulen und versen (das alterthomb betreffende) aus den authoren, poeten, und scribenten gezogen, dar zu gesatzst.

 

 

 

Vivo senex patriæ, domuique, meæque saluti.

Numen adesse precor, ut ferat auxilium. [1']

 

Hic liber intitulatus et allegatus senectutis, nec refert quod fu___ vitæ meæ non contineat, quia decennio ad sufficientem crassitudinem a_eo excrevit ut vix plura folia admittat, decrepitudinis continvabit pro__ iuventutis sexaginta annorum præparavit.

 

 

Wer willich schreibt, arbeidt mit rast.

Unwillich schreiben ist ein last.

 

Nunc tunc os loquitur, vocem quoque mittit ad aures.

Si tacet os autem, dicta recepta volant.

Voxcaut mens tabulis, alibive reposca loquetur.

Et referet semper, muta sit ipsa licet.

 

Quia sæpissime audita, visa, lecta, dicta, scita viventibus excutit fraudatrix oblivio memoriæ inimica, necnon multiplex occupatio diversorum negociozum, cum a morte minime reminiscamur eorum quæ percepimus et scivimus in vita, nec ea post longum tempus transmittimur in posteros, nisi scriptis concepta, custodita et relicta fuerint, enimuero literavit, et scripturarum a deo opt. maximo, mortalibus impertito, infirmitati humanæ memoriæ medetur, et oblivioni obuiatur, quapropter quædam me ipsum, meamque familiam, domum, patriam et extraneos concernentia mediante calamo et cartha viuus annotavir ve post obitum meam relinquerem, in finem relegendi, recordandi, et ruminandi que action__ nunnque in lucem venissent, aut omnino periissent, quamuis eium mue_ _ex eis____ parui aut nullius sint ponderis, tamen cognitio delectabit eorum et proderitam.

 

Orroboratio aliquot contentoenn ultiman voluntatem mei H. W. concermontium.

 

Kunt und zu wissen sei allen und jeden den jenigen wilche setzen legen oder ____ voreden was in dissem boich senectutis, auch decrepitudinis zum ende aus wie ir _______ gedenckboich miner voriger sechzigh jarn biß an gegenwortich boich ________ stehet, an den orthen, da ich etwas ercleirt, addeirt, ordineirt, ge_ath__ __________ sollen, verpotten, verpeent, oder wes des mehe ist vur gut angesehen hab z_________ zu laissen, wilches dach minen lesten willen beruret, dem dienet, oder ____________ weise sterket, das alles sol eben so bundich und krefftich sin, so fast und ___________ und vollen zogen weiden, als stunde es wortlich in minem testament, daß ____________ funfhondert, sievenunfunfzigh den zwenzigsten novemb. zu einer handt _____________ minem declarationboich dar uber folgens gemacht worden, vßtrucklich ges_____________ da etwas darunden befonden, das nit so bald inß wirck zu stellen were, und __________ weiter noitwendich bedencken neme, dasselb sol nach vorgehaptem reiffem ___________ vorbereidunge zu wolgelegener und bequemer zit verrichtet werden, wie ich dan ________ alles neben minem testament, codicilla, fideicomissen, declarationem, additio___ ______ und besonder diß ortz hieher eitz erwidderen und bestetigen, zu _____________ ich Herman von Weinsbergh licen. testator, und declarrator diß gegenwertigs mit eigen handt geschriben, und underscrhiben, datum anno domini tusent funfhondertzweiund______ uf dodestag vig. sacramenti, den sevenundzwentzigsten tagh des monatzs maij.

Hermannus a Weinsbergh ____ _____

 

Vilgeleibter hausfatter und nachfolger, ich hab wol ein gedenckboich der jaren scheir mines lebens oder miner Hermanni von Weinsberchs alter vom jar 1517 angefangen und biß zu ende des jars 1577 inscleislich vollenfoirt, dar in ich von mir selbst, von minen frunden, von mines fatters hauß, kirspel, stadt, heimat und von vil anderen hohen und nider stands leuthen, wigtigen und geringen sachen eilendt und kurtzlich incorrect allerlei (doch meistheils euch und dem gemeinen hauß Weinsberch zu gutt) angezeignet. Und wolt wol, das ich es zirlicher und besser hatte vermelden, und erkleren mogen, das auch nichtzs deinstligs und nutzligs vergessen were, wie dan ohn zweivel wol vil gutzs dinges (das gar nodich zu wissen were) vergessen und nit gnogsam mit allen sinen umbstenden beschriben wirt sin. Ob nuhe wol etliche schimpfen und sprechen werden, der hat gern geschriben, der hat vil moissiger zeit und nit vil andere nodigere gescheften gehat zu verrichten, iha sag ich, daß ist war, dan het ich es nit gern gethain, nit so moissige zeit gehat oder mit zu vil gescheften were beladen gewesen, so were es von mir nit geschein. Mach des vergilii verslin wol hie anzehen, o melibee, deus nobis hæc ocia fecit, got hat mir dem gemeinen hauß zu gutten und nutz so vil reuwiger moissigkeit verlenett, daß ich sulchs neben andern gescheften verrichtet. Und ob ich nuhe und dan wol vil geschriben hab, so wirt von den nachkomen noch wol mehe gewunschet und begert werden, dan wer kanß alles erdencken oder samlen waß nodich ist, und sin wirt. So hat sich dannest ohn daß sulch min gedenckboich das ich wol ein rapiarium mogt nennen etwaß geheuffet. Vornemlich da ich zweitheil samen gethain hab, also seir wan ich mehe dar zu gethain hette, so sult das boich sulcher dickten sin worden, das man es nit wol bequeimlich het handlen mogen, derhalber ich scheir noitzhalber daselbst hab moissen ufhoeren. Dan dieweil seeszich jar mines alters dar in begriffen, zwischen wilchen min vorige beste ætates verflossen, gedacht ich der allemechtiger ewiger got sult mich viß dissem betrobten und verworren jamerdal erloist und min seel zu sich gefordert haben, so es ein zimliche sterbde ware, das vil menschen binnen und baussen Coln besonder umb mich her diß neigst abgelauffen jar an der pesten verfallen sin. Aber dweil mir der gutige got das leben mit gesontheit biß zu ende des 1577 jars verlenet, so hab ich achtung gehat das umb mich her fast alte betagte menner und frauwen von der burgerschaft und nachparschaft in Coln wonen die ire 70 jare, etlige 80, iha etliche 90 und 100 jare erreicht, deren etliche des lebens schon sat sin, etliche aber noch lenger zu leben begeren. Ich mogt fillicht mit gottes gnaden noch summige jare irer sint vil oder wenich bei leben bliben wie lang es got dem [2'] herren geleibt. In Coln sehen ich auch vil heusser die seir alt sin, boisse wormsticheche, verfaulte swellen, wende, und gebonner haben und dannest nit sobalde uber hauf fallen. Mit lappen kan man sie ein lange zit erhalten, derglichen mach es mit minem armen corper auch zugain.

Will derhalb ein ander gedenckboich zurichten, darin ich das ende mines lebens zum theil moge prengen als lange ich dasselb selbst dhoin kan, das uber ich so ich fillicht nit selbst dhoin kunth sampt minem absterben und begrebniß euch dem hausfatter dar in zuprengen befillen. Nachdem ich aber in vorigem gedenckboich das ende mines lebenß nit hin zu setzen kunte, so will ich doch in dissem andern gedenckboich kurtzlich den anfangk mines lebens und fort an von jar zu jar erwidderen biß zum seszsigten jare mineß alters zu sampt wie alle sachen in gegentwortigheit geschaffen sin erkleren, und folgens dan dar zu setzen, oder begern daß dar zu gesatzst werde waß sich weiters zutragen mogt, also kompt dan damit das ein zum andern, der anfangk, mittel, und ende zusamen, doch das die geschichten in dissem boich mineß alterdhombs, da es die materia geben wurde, etwaß weitleuffiger dan vor hin beschein angezeignet mogten werden, oder auch nit, wie es sich zutragen wirt. Sol diß boich nuhe principalich von minem alterthumb außfoeren, so soll es wol nit unbequeim sin von minen vorigen ætatibus in specie doch auch vor ab in genere etwaß zu vermelden.

Hie hab ich euch nuhe vilgeleibter hausfatter aetatum vitæ humanæ, das ist, der menschen alter zu erinneren. Die alte geleirten, weisen und philosophi haben sich damit bekommert, die beschriben und getheilt. Etlich und vornemlich die rechtzgelerten haben ein principail summarische dheilung kurtzlich gemacht, und sagen das etliche underjarigen alters sin biß zu irem funfundzwenzigsten jare, etlich oberjarigen alters fort an so lang sie lebendt sin, und nennen sie minores et maiores. Disse zweitheil undertheilen sie aber widder, wie dan in den rechten geistlichen und weltlichn gnogsam tracteirt wirt.

Etliche haben die aetates in dreitheil getheilt, also hat Seruius Tullius daß romischs folck getheilt. Die kindtheit biß zum 17 jare erstreckt. Das stritbar manlich alter biß zum 46 jare. Das alterdhomb da von biß zum ende deß menschlichen lebens. Hie von hat Aulus Gellius, lib. 11. cap. 28 clare anzeigung gethain den man lesen mach und weitern bescheidt da von vernemen.

Etliche authores und poeten haben sie in veirtheil getheilt eben wie daß gansse jar in veir theil getheilt ist. Verglichen die kindtheit dem glens. Die jugendt dem sommer, die manschaft dem herbst. Das alterdhomb dem winter. Diß hat der Cicero, in lib. de senectute gethain. Auch Ovidius, und Haratius. Wil disser poeten carmina her zu setzen.

 

Quid non in species secederequatvor annum.

Aspicis, aetatis peragentem imitamina nostræ?

Nam tener et lactens puerique simillimus ævo.

Vere novo est, nuncherba nitens et roboris expers.

Turget et insolida est, et spe delectat agrestes.

[3] Omnia tum florent, florumque coloribus almus.

Ludit ager, neque adhuc virtus in frondibus ulla est.

Transet in æstatem post ver robustior annus.

Fitque valens iuvenis neque enim robustior ætas.

Ulla, nec uberior, nec quæ magis ardeat ulla est.

Excipit autumnus posito fervore iuventæ.

Maturus mitisque inter iuvenemque senemque.

Temperie medius sparsus quoque tempora canis.

Inde senilis hiems tremulo venit horrida passu.

Aut spoliata svos, aut quos habet alba capillos.

 

Reddere qui voces iam scit puer et pede certo.

Signat humum, gestit paribus colludere et iram.

Colligit et ponit temere et mutatur in horas.

Inberbis iuvenis, tandem custode remoto.

Gaudet equis, canibusque et aprici gramine campi.

Cereus in vitium flecti, monitoribus asper.

Utilium tardus provisor, prodigus æris.

Sublimis, cupidusque et amata relinquere pernix.

Conuersis studiis ætas animusque verilis.

Quærit opes, et amicitias, inseruit honori.

Conmisisse cavet quod mox mutare laboret.

Multa senem circumueniunt incommoda, vel quod.

Querit et inuentis miser abstinet et timet uti.

Vel quod res omnes timide, gelideque ministret.

Dilator spe longus, iners, avidusque futuri.

Difficilis querulus laudator temporis acti.

Se puero censor castigatorque minorum.

 

Etliche anderen machen funf gradus ætatum, erstrecken der kinder alter an daß 15 jare. Der jonglingen an das 30 jare. Der jonger man an das 40. Der dapfer man biß an das 60 jare. Der alter man biß an das ende deß lebens. Wie Marcus Varro disse dheilong also gemacht.

Etliche machen auch sex gradus. Etliche seven gradus, wilche da die kindtheit undertheilen in unsprechendt biß zum sevenden jare, und fort in papillare biß sie mechtich und manbar werden, also auch senium in decrepitam ætatem und zur ærden buckendt alter. Etliche eitziger zeit machen und stellen die alter von zehen jarn zu zehen jaren, jeder decennium sol ein besonder ætas sin biß zu hondert zu. Wissen dieselben fein mit bildern und theren dem alter zu gethain gar schoin abzumalen und ist nit so unbequeim.

Nuhe ist gliche vill wie die ætates und alter des menschen getheilt und undertheilt sin und werden. So vil min person antrift mirck ich gar wol, daß min aufgande mit dem stainden alter umb ist, sie werden genent und getheilt wie sie willen. Und daß ich eitz inß abgande alter achter minem seszigsten jare getroden sin. So alt war eben min fatter Christian und nit vil elter dan 60 jare do er starb. Mineß fatters fatter aber, Gotschalck, war 63 jar alt, wie er dhoitlich abginge. Sulch besweirt mich uber all nitzs, dan bin froe, daß es so weit mit mir komen ist, daß ich mit gottes gnaden zur seligkeit deste balder mach gerathen, dan diß erdigs leben moiß doch sin ende einmal erreichen, waß wirt, vergehet, waß geborn, stirbt, es fal kurtz oder lanck. Bedanck mich der 60 jaren mineß fatters alter, das ich die zeit daß liebe broit mit erhen gessen hab, [3'] das ich nit gescholten darf werden, alß het ich durch uberfluß min zeit verkurtzst. Hett ich sie sunst sonder groisse sunden und besser nutz umbpracht were wol zu wunschen, doch wil mir got barmhertzich sin. Fort auß den obbeste miten ætatibus und altern, besonder auß denen die drei theil oder grade machen, befindt sich, das mit mir zweitheil schoin umb sint. Die veir theil machen, daß derselben drei verlauffen sin. Die funftheil verordnet, das deren veir verflossen. Also mit denen die seeß theil gestalt, das deren funf hin wegh sint. Dar auß dan zu ersehen, das min infantia, pueritia, adolescentia, iuventus, virilis ætas seu gravitis dem vorigen gedenckboich inverleibt umb und dar von sin, und daß nur allein min senium und alterthumb noch vorhanden sie, so lang got geleibt. Iha mit mir ist der glens, der sommer, der herbst schoin verbeigangen. Aber der kalte winter ist noch uberich. Jetzo ist der betagten leudt sprichwort und sage, der mensch hab drei tag zu leben, der weren mit innen schoin zwein umb. Diß spruchs mogt ich auch brauchen, und sagen, ire liebe tage mineß waxsenden und standen alters ir sidt hin gesclichen, o ver, o æstas, o autumne ætatis mex ade, ade, restat hiems tantum. Ich Herman dhoin mich aber gegen godt minen herren gegen alle groisse woldathen zum hoigsten bedancken, daß er mich die jaren mines alterdhombs vor so vil tausent menschen hat laissen erreichen, wilche miner 60 jaren wol begert und nit erlangen mogen, damit bin ich der voriger alter gewiß. Die aber noch in den eirsten altern stecken sin der minen ungewiß, sie geben fillicht vil drumb, daß sie derselben gewiß mogten werden. Vill auß minem gesclecht und fruntschaft, vil mehe auß miner nachparschaft und alten gesellen und kundtzleuthen, noch mehe auß minen mitburgern und inwonern sin mit dhoit verfallen, dan eitzo bei leben sin, die nit 60 jare alt sin worden, wenich von den uberigen sin elter von jaren dan ich sin. Nit zehen herren auß allen rhaitzpersonen und rethen der stat Coln, deren dannest uber anderhalb hondert gewesen, sin vorhanden in leben, die vor mir und dem jar 1543 zu rhade gesessen, ob wol min alter nit so gar hoich ist. Ich bin eitz der allerelste uff ein einige persone nach von allen lebentigen, die auß dem hauß Weinsberch alß von minem fatter und fatterßfatter untsprossen sin (nemlich min moen Drutgin van Weinsberg diß jar 78 den 18 julii gestorben, vide infra fol. 40.). Iha ich durft sagen wie ich es gewislich dar vor halte, das in minem leben wol zweimail so vill menschen in Coln verstorben sin alß eitz dar in leben. Darumb hab ich mich der gewisser 60 jar billich zu erfreuwen vor so vil leuthen. Hie will ich mich aber miner jaren nit beromen oder versundigen, dan got wirt nit ansehen wie lang der mensch gelebt hab, aber wie wol er gelebt hab, ob er alt gewesen, dan ob er gut gewesen. Dan allein gedenck ich diß dem allemechtigen sonderlich dar vor zu dancken, zu loben und zu prisen. Will aber sunst kein lenger zit zu leben wonschen oder begern nit einen tag oder stunde, dan wan es deß herrn wil ist, will ich bereidt sin zu scheiden auß dissem jamerdhall, allein so vil zit und gnaden daß ich min sunde [4] bekennen, leidt dar vor tragen und bessern mogt oder daß nur got ein barmhertziger richter und gutter fatter wult sinn, sin armeß gescheft nit laissen verderben.

Glich wie nuhe die menschen hinfallen so wehen auch die jaren umb. Wie fast vil kinder, vil jongelinghn, vill jungen und alter menner sich verbirgen also faren die veir theil des jarß auch da her, und wirt alles vergain uff dissen erdtrich, waß worden ist. Der glens oder frolinck gronet, blouwet, wegst, ist gar suberlich und lustich von gronen saftigen krutern und blettern, mancherlei farben und angenemen gerogs blomen, die schoin inß auge, und nasen sin. Eben so sin auch die menschen nach der gebort und in der waxsender kindtheit gar leiblich und schoin und werden noch mehe gezeirt, sin ohn galle einfeltich, spillen samen, sin jederman leidlich und angeneim. Sulcher froelinck ist lang mit mir umb gewesen. Was sich aber minenthalb dar zwischen zugetragen, da von sagt min forich gedenckboich.

Der sommer ist auch frolich, lustich, rustich, uber auß suverlich, warm, und hitzich, dan schirt man die schaiff, beschawet den arn mit gellen helmen und aren durch das felt, samlet das abgemehet graß in die heuberme, smacht daß frohe gewegs erber wolber steinafs garten gekruder. Dan ist der menschs dem glich in der jugendt, ein jonglingh ein jonge jonfrawe und medtlin stehen uffrichtich wegen sich, springen wie hitzer und hinden, haben lust, reithen zu roß, jagen und bissen mit mit honden und falcken, fahen die foegel, wegst innen der bart, sehen umb und umb, greiffen zur ehe. Disser somer ist mit mir auch abgelauffen, wie daselbst im gedenckboich angezeigt.

Der herbst ist glichfalß lustich, nit so seir inß augh alß in den baugh, bringt vill gutter fruchten bei, vil purpere truben, gutten gesmachs gelle und rothe eppel, birren, castanien und mancherlei boum und garten gewegs, der newe most und wein wirt gemacht, der fruchten garben gedresset und kumpt eitz die lange begerte nutzung her vor. Disser herbst verglicht sich dem volkomen menlichen alter, daß auch gutte frucht und nutz beibringet. Disse zeit soichen die menschen narung, gelt und gut, renthen, erfhafften, richtumb, ehr, und regiment.

Und ob wol min glenß, somer, und herbst nit so wol gegronet, geblohet, gewagsen und fruchten im arn und laesen beipragt alß wol hett geschehen kunnen und mogen, so moiß ich damit gedolt haben, hab ich es versaumpt, billich trag ich den schaden. Es licht auch am menschen fleiß allerding nit allein, wie gut der acker, wie wal er regeirt wirt, wie gut die zeiten und daß jar ist, so hilfs allet nit wanß got durch sin gnade nit verlenet. Das unser sunde halber ohn zweiffel also widderfereth, were manchen und mir selbst villicht nit nutz zu vill glucks gewesen, hett zu hoichfertich und stoltz mutwillich drufft mogen sin, waß got beschert ist alles gut und werdt.

So sin nuhe min vorg. drei alter und theil des jars hin gelauffen, doch nit gar stillich, haben wol etwaß rawes wetterß getroffen, daß saur mit soissen ist dar zwischen komen. Und ist nuhe fort an mit mir nit mehe dan der kalter, nasser, forstiger stiller winter vorhanden, auch ungewisser ob es der vorwindter oder nachwinter samen oder besonder zum theil oder halb oder zum mal soll sin.

Und troist mich [4'] dannest, das man im winter geneissen mach, was der glenß, der somer, der herbst beibracht. Der harte winter kan auch rhait finden und linderung mit einem gutter warmen peltzs, bei eim gutten feur, in einer warmen stoben, und genoist oder nutzst der drier voriger theil des jars. Er erlustigt sich des groenenden blowenden frolings wan er dar an gedenckt wie ich eitz dhoin, daß ich da vill gelitten hab. Deß schoenen somers erfreuwet er sich, waß er dar innen studeirt, gelesen, geleirt und gehandlet, daß mir sier wol im alter eben, und mogt kein erlichern und besser lust haben alß verneuwerung der alten leer, eitz in historien und andern boichen zu lesen und daß schriben.

Er genuist auch deß fruchtbarlichen herbst, waß derselb beipracht, und mir, daß ich dar in ob deß schoin nit vil, so ist es doch zur noitturft mit geluckt und gerathen, daß ich mit sperlicheit umbweren mach, da mit mach ich zu friden sin, dan ob ich deß schoin neit zu freden were, so hilft es doch nit. Dem genoigt mit dem jenigen waß er hat, das ist der richste und seligster, der da lebt.

Und ob die vorbestimpte drei theil und zeiten des jarß und alter nit mehe vorhanden sin, so darf sich doch der winter oder oder das alterthumb ireß hinscheidenß nit zu seir besweren. Dan wie der poeta ausonius, de vita humana schreibt, es hab jedes alter und theil sinen last, sorge, und ungemach. Will die carmina davon vermeldende mit herzu setzen.

 

Quod vitæ sectabor iter? Si plena tumultu.

Sunt fora, si curis domus anxia? Si peregrinos.

Cura domus sequitur? Mercantem si nova semper.

Damna manent? Cessare vetat si turpis egestas?

Si vexat labor agricolam? Mare naufragus horror.

Infamat, poenæque graves in coelibevita.

Et gravior cautis custodia vana maritis.

Sanguineum si martis opus? Si turpia lucra.

Foenoris, et velox inopes usura trucidat?

Omne ævum curæ, cunctis sva displicet ætas.

Sensus abest paruis lactantibus et puerorum.

Dura rudimenta, et iuvenum temeraria pubes.

Aflictatfortuna viros per bella per aequor.

Iras, insidiasque cathenatosque labores.

Mutandos semper gravioribus, ipsa senectus.

Expectata diu votisque optata malignis.

Obiicit innumeris corpus lacerabile morbis.

 

Was ohn das angeregte dem menschen durch alle sin leben und jedes theil sins lebens widderfirt, da von findt man vill beschriben, und der vil mit den leuthen conuerseirt, der erfirt es leider selbst genoigsam. Es ist nit in dissem orde allein, es ist in allen stetten und landen, war man hin kompt, da findt man ellendt, irthumb, armutz, kranckheit gnoich. Die kindheit, wie unschuldich sie ist, wirt frilich nit ohn beswerniß sin, ist manchelei swacheiten und gebrechen underworfen, kan sin meinong und anligens noch nit außretten, hat wenich verstantz, nit mehe dan unredliche creaturen, kan sich auch weniger selbst helfen oder erretten, dan jonge hoinlin foegel und getheirß, moiß sich van den elteren gesinde und schoilmeisteren laissen regeren, irer ungeschicklicheit, folheit und zorn oft under worfen sin. Die jugendt ist auch wilde, bager widder [5] spennich, unachtsam, verthoinlich, unerfaren, unbehut, sticht sich oft in vill gefhar mit springen, klimmen, zancken, fechten, mit lichtfertigem verheischen und handlen, boser geselschaft, ungerathen heiligen, ist klein vorsigtigkeit bei im sinen schaden zu vorkommen. Das menlich alter hat groisse sorg, mohe und arbeit, moiß vill uber landt und wasser reisen, in kregen besatzung und uff der wacht sin, mit groissem fleise tragten, wie er weib und kindt ernere. Erlich hauß halte, den frunden und nachparen zu leif und leide sich finden laiß, das er nit der geringste sie und veracht werde, sinen standt mit ehren erhalte, sin ampter, deinst, gescheft und beroif mit fleiß verrigte.

Hab ich mich nuhe der drei foriger alter nit mehe zu erfrewen in dem, waß sie lust, forthelß und nutz an sich haben, so hab ich mich irer auch nit mehe zu betroben in dem, waß sie besweirniß, sorg und last uff in haben. Dan kein dinck ist von forthel, es hat auch sin unforthell, und hinwidder. Der forigen theil und alter bin ich ab, die dar in sin, mogen sich die zu nutz machen besser dan ich gethain. Hab ich mich dan nit mehe da mit, daß sie lustich undnutzlich sin zu bekommern, so kompt ire unlust und last auch nit mehe uff den rucken. Mit eitzigem alter, mit minem alterthumb, mach ich mich so frolich machen alß ich kan. In dissem lesten alter mach mir auch gott helfen, daß ich das zur selen heil und seligkeit moge also zu nutz machen, waß in den forigen versaumet zu dissem verguittet werde, wan das ende gut ist, so ists alles gutt. Ist der windter von wegen gruisser kelte abschevlich, so hat er dar gegen lange nachten, vil rawe und rast und ander forthel wie oben angezeigt. Ist der somer wol von wegen der werme angeneim und wegen deß langen tags nutzlich, so hat er dargegen vil unforthels vol stetiger arbeit und unrawen hitzst, flohe, gewormß, weiche giftige lufft und vil ungemachs. Also ist es auch zum theil mit dem glenß und herbst gelegen, die beide sin auch nit ohn reif ungewetter und kranckheit. Ich hab auch in jedem alter daß folck hoeren weinen klagen und karmen, nit so vil von den alten alß von denen in den vorigem alteren, finden der vil gedultich und der hofnong daß ir ellendt sich zum ende neiket.

Aber damit nuhe die obbestimpte ætates und alter minem vorigen gedenckboich inuerleibt von minen seszich jaren vermeldende auff min person accommodeirt werden und eben komen mogten, so ist wol war das etliche mehe etliche weniger grade und theil gemacht und dieselben auch widder undertheilt haben. Edoch, so bedunckt mich, die funf graede der alter, da von oben ausser dem Varrone gesaget, sullen am besten und eigentligsten uff min person scleissen. Disser regnet die kindtheit biß zum funfzehen jare, dan so lange und druber lesen und schriben auch min grammaticalia in Coln wie auch zu Emerich geleirt. Da von biß zum drissigsten jare hab ich in der universitet zu Coln in artibus atque legibus studeirt und dar in promoveirt, dar zwischen ich min beide eltern samen bei leben gehat, aber minen fatter hab ich darnach balde verloren. Disse zit nennet er [5'] adolescentiam, das einer ein jonglin sie. Von dan biß zum veirzigsten jare setzst er juventam, das einer zu eirst ein jonger man sie. Under dissen zehen jarren hab ich in minem eirsten ehestande mit miner fruntlicher hausfrauwen Weisgin Ripgin von Neuß gelebt. Aber von veirzich jaren biß an daß seszigst jare nennet erß das menlich alter volkomen, dan anfancks des veirzigsten jars hab ich zum zweiten ehestande mit miner lieber hausfrauwen Drutgin Barß auß Coln burdich gegriffen und sin in sulchem ehestant uber funfzehen jare verpliben, do min hertzliebe motter Sophia noch gelebt aber uber zwei jar dar nach auch in got verstorben. Und hab nach miner zweiter hausfrawen funf jar im widuwen standt gesessen und widman bliben biß zum sestigsten jare mines alterß. Nach ietzigem seszigsten jaren fenget nuhe daß funfte theil an nach siner regnong und dheilong, dar mit min senectus und alterdhomb auch angehet, also sin disse sexzich jar im vorigen gedenckboich begriffen. Die eirste drissich jar vermelden von minen zweierlei studiis und leerzeiten, damit die eirste zwei alter nach der meinong Varronis obgewert. Aber in den uberigen drissich jaren sin min zweierlei ehestende verfast. Und ob ich wol die neigste funf jare von eitzigem tage ruckwartzs zu zellen gar keine frau gehat alß nach minem ehestait, so hab ich doch die neigste funf jar vor minem ehestait nit eder zit gar ohn frawe unthalten. Und sin also im ehestande scheir die zwei ander alter hingangen. Und ist nach der vorg. meinong die funfte und leste ætas alß min alterthomb uberich und zu den andern veiren in daß eirste gedenckboich nit komen, sonder soll da von in dissem zweiten und lesten gedenckboich gehandlet werden.

Hie mit wil ich es mit den ætatibus und deren dheilungen und underscheide berauwen laissen, da dan von ist nuhe gnog gehandlet. Aber will min ganß leben vom anfanck miner geburt jar vur jar in diß gedenckboich summarie und kurtz vor an setzen biß an min sesszigst jare. Dan dieweil ich in dissem gedenckboich wil anzeignen, waß sich von mir und den minen auch anderen zugetragen hat, so sol wol nodich sin, das ich es allet ungeferlich was vorhanden sie schribe, nit allein waß in minem alterdhomb beschein, dan auch ungeferlich, waß sich vorhin verlauffen hat, da mit daß einß bei dem andern verstanden werde. Nach dem sich villicht zutragen mogt, das man bei dissem anderen gedenckboich etwaß begerte zu wissen und auch nodich zu wissen were, und daß eirste gedenckboich nit bei handen sin mogte oder ingesclossen were, daß man dan auß dissem zum theil underricht mogt werden, oder zum wenigsten etwaß anwisung und erinnerong hette. Und ob wol daß ende alß vom alterthomb bei dem forigen gedenckboich nit ist und wol bequeim daßselb dar bei were, so es dan da nit wol dar zu komen kan, so wil ich doch [6] den effect desselben vor dissem nit auß laissen, dieweil diß bequemer geschein kan. Glich wie dan die abgelauffen zeit deinlich wirt der kunftiger zeit deß alterthombs sin, eben so deinlich auch die gegenwortige zeit sin und wie alle dingen und sachen minenthalb dar in geschaffen, alß nemlich in momento also zu reden zwischen den vorigen minen altern und dissem minem lesten alter, daß ist, im anfange mineß alterthumbs, so kompt dan daß preteritum, presens, et futurum in ein boich zusamen min ganß leben, und wirt der gegenwortige gestalt rechte wol vor dem alterthomb stain, und dem ein erklerung sin.

Drumb hab ich nuhe in dieselb gegenwortigkeit bracht, wie es anfangks diß jarß 1578 mit minem leib und allen glideren geschaffen sie, von der lengden, dickten, groisden, mit abcontrafitung mines gansen angesigts mit allen sinen stucken, so vil moglich war, daß auch scheir ein maeler min contrafeitung nach minem dhoit dar nach machen und ungeferlich deliniern und formeren mogt mit har und bart und kaler stirnen, oder sunst ein bilden hauwer, glassworter, außstecher. Mines ganges, stimmen, memorien, gesigtes, gehoirß und aller miner complexion, auch letzungen, gutter und boeser sitten, naturen, maneren, und gewonheiten, wonungen, geselschaften, kosthaltung, allerlei kleidung, kleimaten, inkompsten, standtz, narung, oberkeit, nachparschaft, und neigster fruntschaft und sipschaft nit vergessen, dan deren kurtzlich zum theil gedacht, wie daselbst und anderswa von mir angezeignet ist.

Es mogten sich aber etliche leuth, den diß min gedenckboich auch anders, waß ich mehe geschriben hab, in die hende queim daß lesen worden, verwonderen, waß ursachen ich so vill vergeblicher besonder arbeit angetriben und so vil in die feder brat het, und daß von mir selbst, und nit von nutzeren und wichtigern sachen, dar dem gemeinen nutz und vil leuthen an gelegen were, waß innen hilf min leben und min geringe gelegenheit zu wissen.Uf diß ire dencken oder wort moiß ich innen wol zu fallen und recht geben, ich het die zit und arbeit fillicht wol beß mogen anlagen. Aber hie ist zu wissen, daß ich diß min gedenckboich und ander boich euch, vil geleibter hausfatter, zur zit allein dediceirt, zugeeignet und zugeschriben hab, und nit jedem leser. Gegen euch tragh ich keinen schewe, den ich scheir vur allen menschen leib hab, und gutzgan, den ich gern daß aller best ich mogt beforden wulle, ir werdt mich ohn zweiffel widder leib haben und alles min thoin und laissen inß best außlagen. Eitzo, dieweil ich noch den lebentigen athem hab, redt ich zu euch, erzel euch min leben und min geschicht, deß hauß herkompst und deß gantzen gesclechtzs gelegenheit. Wan ich von dissen erdtrich und disser platz gescheiden sin, werde ich euch nit mehe zureden werden, diß ortzs, euch nit mehe schriben. Drumb hab ich lust und freude, daß ich es eitz thoin kan, daß irß kunftiglich wissen und vernemen werdt, ir sult min erb und nachfolger sin. Ich setz ir wult mich gern fragen, wult diß und jenes gern von mir wissen, waß berichtz ich euch kunt geben, so kan ich es dan leiblich oder unleiblich nit dhoin. Einer queim dan im ewigen leben zum andern, daß unß der allemechtiger ewiger got will verlenen, da mogt es geschein, sunst nit, dan dißmal durch daß einich mittel der federen, vucks, und papirs, daß nach deß menschen leben die gedechtniß erhalten kan. Wa ir auch mich leibt wie ich euch, so wirt euch diß min gespreich, erzellung und schrift freude und lust geben. Vernimpt ir etwaß gutzs dar in, daß lerens und behaltens werdt ist, daß leirt und behalt. Ist etwaß nit gut, dar vur hut euch und verbessert es, doch wendt es alles zum besten.

Daß ich aber von groissen stadt und lant [6'] sachen sult geschriben haben, da sin schriften gnoich van und wil daß andern befollen laissen sin. Ich handlen und reden eitz mit euch alß mit minem son, der sterblich und unsterblich sol sin, von wegen siner person sterblich, sines amptzs als hausfatter unsterblich. Jahe von mir, von euch, von unsen sachen und heußlichen sachen, verzelle euch auch etwaß von frunden, nachparn, burgern und anderß, waß ich weiß oder gehort hab alles ungefairt und frei. Befelle euch fort diß boich und alles inhalt mineß testamentz, codicils und declarationboichs.

Noch hab ich einen extract gemacht ausser dem M. T. Cicerone de senectute. Et ex apophtechmatibus d. Erasmi Ro. Ausser etlichn poeten und andern authoribus, waß sie de senectute melden, sagen und halten. Dar ausser ire eigentschaft und ampt zu vernemen ist, da etliche es loben, etliche lastern etlich gutte leren geben, wie man sich dar in halten sol. Diß extract oder collectanea hab ich eilens vergadert und herzu gesatzst. Der ursachen und meinong dieweil min alter hie ist, da von ich schriben wil, daß ich dan dar in zu zeiten etwaß deinstlichst lesen moge und dar an gedencken mich darnach auch in minem leben etwaß regulern kunne. Ir und ein ander, der alt mach werden, auch dar durch ein anmanong haben moege, daran zu dencken. Es were noch wol mehe dar zu zusetzen gewest oder ordentlicher, mich hat aber deß vil nachsoichen und arbeitzs verdrossen. Wa es die gelegenheit und zeit vergunt, so mogt es noch wol geschein zu siner zit.

Dem allem nach, vilgeleibter haus fatter und nachfolger zur zit, habt ir gehoirt und gnogsam verstanden, wa ich es im vorigen gedenckboich miner 60 jaren gelaissen, und waß ursachen mich bewegt, diß ander gedenckboich von minem gedenckboich minß alterthombs uffzurichten. Wie ich die herbkompst und ursprunck unser und deß hauß und gesclechtz Weinsberch hab vor anlaissengain. Dar uff min leben summarie mit allen umbsten laissen folgen. Auch den extract von dem alterdhomb zu latin vergadert gesatzst. Und wil nuhe jar vor jar min alterdomb verfolgen, so lang mir daß von got gestattet wirt. Und ist min fleissich bitt und beger an euch, ir wilt diß boich verwaren und, da ich es laissen und uffhoeren werde, continueren biß zum ende mineß lebens. Da irß nit so bequeimlich doin kunth oder gern schribt, so verschaft es durch einen andern, der wol schriben kan. Wie ich euch diß boich daß hauß Weinsberch befilte und alles gutzs zu vertrauwe. Und sidt damit gode von himmelrich weitherß hin sinen fatterlichen allemechtigen schutz, schirm und verwarsamheit befollen.

Datum zu Cronenberch uff der Hoeportzen in Coln, anno domini 1578 den 20. tag janvarij.

Herman von Weinsbergh l. s. et subs.

 

 

 

In zeiten Caroli magni der francken koenincks, do man schreif nach christi gebuirt sievenhondert veirundneunzich jar, den dritten tag des monats maij, vor der morgen roethe, ist in der herschaft Brunsa in Baiern zwischen der Donau und Behmer walde auff einem weinberge ein wolgestalt kindtlin menlichs kunne von der schoner Adelde einer dochter Fullonnis geboren, daselbst heimlich verlaissen, und den selben dagh durch anzeigunck der foegel und jagehonde gefonden, zu hauß gefoirt, unwissendt, wem es zuqueme, und daher Aramondt von Weinsberch genent, und vur ein fondelingk gehalten worden.

Disser hat folgens bestimpten weinberch sampt der herligkeit zum eigenthumb erlangt, ein wonhauß, auch ein bedehauß uff sin geburtzs platz gebaut, kinder gezilt, der abgottereien abgesacht, sich teuffen laissen, christen worden, ein hausfest angericht, und ist sunst zu eim herlichen hausfatterlichen stande und wesen gerathen. Ist der anfanck deß namen, stamß und gesclechtz gewesen. Und wil derhalb sin afkompst in der menlicher linien setzen und lauth wie nachfolgt.

 

Aramondus ist ein fatter folgenden Tillonis gwesen.

 

Tillo eitzgemelter ein fatter Eusebij.

 

Eusebius eitzgemelter ein fatter Hilperti.

 

Hilpertus eitzgemelter ein fatter Blonderici.

 

Blondericus eitzgemelter ein fatter Adriani.

 

Adrianus eitzgemelter ein fatter Herminij.

 

Herminius eitzgemelter ein fatter Hiddonis.

 

Hiddo eitzgemelter ein fatter Caroli.

 

Carolus eitzgemelter ein fatter Hartemanni.

 

Hartemannus eitzgemelter ein fatter Paulini.

 

Paulinus eitzgemelter ein fatter Balthasaris.

 

Balthasar eitzgemelter ein fatter herrn Henrici.

Von wilchem neigst hernach folgen wirt. [7']

 

Disser eitzgemelter Henrich ist im jar nach christi geburt, do man schreif eilfhondert funfunddrissich den sevenundzwenzigsten tag julij, auff dem alten haus Weinsberch in Beiern geboren, aber in der neuwer stadt Weinsberch bei der Neckar in Swaben erzogen. Und in eroberong eitzgenenter stadt von keiser Conrado durch behendigkeit siner motter Sabine und anderer frauwen widder erloist und zu ruck bracht worden. Und alß er sich von jugendt zu hoiffe in den sitten, binnen und baussen landes in der leer, folgens auch in kreichs hendelen wol anschickte, und durch sin ansclege und heubtmanschaft dem Meilendischn kreich die uberwindong zu wege pracht wart, ist er von keiser Fridrichen dem eirsten zum ritter gesclagen im jar 1163 und mit eim wapenschilde (dar in das swartze sparklee im weissen und uff dem helm ein guldin kroin mit einß heuptmans arm stunde) vor in und sin nachkomen vererhet. Auch folgens zu einem freiherrn zu oberen Weinsberch gemacht. Wilches wapenzeichen sampt siner afkompst ich auch hernach setzen will.

 

 

 

Henrich von Weinsberch freiher vurg. und Hildegardt von Lahems swaben eheleuth haben iren son Landerichen anno 1178 den 1 octobris binnen Eystadt gezeuget.

 

Landerich von Weinsberch freiher vurg. und Judith van Reuneck eheleudt haben iren sohn Alexandrum anno 1219 den 5 aprilis zu Regensburch gezeuget.

 

Alexander von Weinsberch freiher vurg. und Eva von Hennenberch eheleuth haben iren son Marcum anno 1247 den 25 aprilis auff dem scloß obern Weinsberch gezeuget.

 

Macius von Weinsberch vurg. und Eva von Ernstburch eheleuth haben iren sohn Hillebrandt den alten anno 1286 zur Atten bei Biberach in Swaben gezuget.

 

Hillebrandt von Weinsberch der alte vorg. und Susanna Quebburch eheleuth haben iren sohn Hillebrandt den jongen in Strasburch gezuget.

 

Hillebrandt von Weinsberch der jonghe vorg. und Magdalena von der Adocht eheleuth haben iren sohn Johan anno 1340 in Coln gezeuget.

 

Iohan von Weinsberch vorg. und Cathrin von Else eheleuth haben iren sohn Christian diß namens den eirsten anno 1382 den 4 febrvarii in Coln gezuget.

 

Christian von Weinsberch der eirste vorg. zu zeiten rottenhorn genant und Catharin von den Moeren eheleuth haben iren sohn Frowinum anno 1417 in Coln den 21 junii gezeuget.

 

Frowin (Frobenius)von Weinsberch vorg. und Clara vom Doirholt eheleuth haben iren sohn Gotschalcken anno 1439 anfancks deß aduentz zu Swelme im Marckschen lande gezeuget.

 

Gotschalck von Weinsberch genant von Swelme vorg. und Maria Keppel eheleuth haben iren sohn Christian den andern diß namenß von Swelme genant anno 1489 den 14 augusti in Coln gezeuget.

Dar von sol neigst hernach weithers vermelt werden. [8']

 

Neigstbemelter Christian von Weinsberch, genant von Swelme, hat nach sinem sevenden jare s. Georgen scholen gangen lesen, schriben, rechnen, aber wenich latinß gelert. Under deß starb sin fatter Gotschalck vorg. anno 1502, den 13 octobris und wart s. Jacob begraben, da er vor hin achter und nevlich drei monat kirchmeister gewesen. Auch dreimail von wegen deß swartzenhauß zu rhade gesessen. Und Christian wart do in sinem 14 jare auff s. Annenberch inß landt von Meissen verschickt, da er bei einem munßmeister (der die eirste joachims daller munste) komen, und bei zit sinß deinst daß wort daller eitz allenthalben bekant uffquam. Und als er da drei jar gewont, hat in sin motter Maria Keppel widwe gen Coln gefordert und zu sich in ir hauß Weinsberch ire mit dem weinzappen und ferbereien zu helfen genomen. Dan domailß war das bla garn zu ferben sulch groisser handel in Coln, daß die bach uff von der Hoeportzn biß zu Weisse frawen under Blaferber genant wart eitz gar vergencklich. Und er hat im groissen ufflauffe anno 1513 sin harners eirst moissen anzehen und sinen eidt uff das swartzehauß gethain. Wie er aber 23 jar alt war, hat in sin motter an ein jonge colinsche dochter, genant Catharin Koelgin bestat und bei sich ins hauß genomen. Disse lebte nit vil uber einjar, das sie keinen leibserben verleiß. Daher Christianen der gutter halber ein swerer gerichtzs handel erwoiß, deß er bei veir jare im widwe staidt vißwarten moist und mitler weil bei siner motter verpliben.

Umb disse zeit wonte zu Dormagen auch ein widwe, Margareth Baechmans genant, lebte von irer eigen landerien und wirschaft. Ir verstorben ehewirth hatte hermanKorth geheischen, war von Dusseldorf burtich, vormalß des alten und lesten hertzogen von Gulch und Berge sampt gravens von Ravensbach secretarius gewesen, ehe dan daß landt von Cleve und Marck zu den vorigen landen komen. Disser HermanKorth ist folgens der funfte zolner zu Dormagen im lande van Gulch worden, da er sich zu hauß gesatzst, erb und gutter gegolten und ist anno 1509 in got verstorben. Mit dissem hatt bemelte Margareth under andern ehekindern ein jonge dochter, gnant Sophia Korth anno 1498 den 25 febrvarii gezilt, die eitz bestetlich war.

Dismail wonte zu Polhem ein gar erbar ansehentlicher halfen, gnant Coenß Horn. Der handlet vil mit obgerurtem Christian von Weinsberch und seiner mottern. Verkauffte innen weith, da mit sie ferbten. Disser Horn hat groisse kuntschaft zu Dormagen, da er bei Sophien vorg. mottern (wan er heu in den benden bei Zonß plach zo holen) in der herbergen lagh. Und bracht den heilich zwischn Christian und Sopheien zu Coln und zu Dormagen dermaissen an, daß die eltern und frunde balde in verstunden, deren rhaidt die jonge leuth heir in folgten. Und alß sich diß sach mit ab und an brengen durch daß jar 1516 verweilet, wart der heilich dasselb jar umb martini besclossen.

Darnach, anno 1517 uff sontag 25 janvarij, war der hoichzitlicher [9] brulofstag, daß sie sich den vormittage zu Dormagen in der kirchen offentlich vor dem folck treweten. Daß essen war daselbst in der motter hof oben am ende deß dorfs, eitz zum Swanen do Pynnekrantzhof genant, herlich wie der zit breuchlich mit den frunden und nachparen gehalten. Folgens, den 3 febrvarij, worden der brudegam und brut zu Coln inß hauß Weinsberch mit freuden untfangen und innen ire heilichs penningen in beisein der frunde uberzalt. Und Maria Keppels hat den jongen eheleuthn ire zinshauß neben ire (Wenemarß huiß im schrin genant)ingeraumpt, dar in mit weinen und ferben ir narung zu soichen. Jetziger eheleuth namen sin beide greickische worter. Alß Christianus ein christ, und Sophia weisheit bedudent, wonder gutte anmanongh dhoinde, christlich zu leben und weislich zu handlen. In dissem jar 1517 haben sich zwa ubertrefliche sachen bei heiden und christen zugetragen und vervestigt. Da her diß jar namhaft ist. Dan der turckisch keiser Zelem oder Solymus hat den lesten sultan zu Alkyro ersclagen und sin rich vißgetilget, im Syriam Aegiptum, Iudeam, Hierusalem, Alepo, Damaso, Alkÿro und vil koninckriche landen und stette abgewonnen, daß grab ihsu christi und catharinæ uff Synai geerhet und berentet. Zu dem hat sich ein augustiner monchelin zu Wittenberch, Martinus Lutherus dem pabst Leoni 10. widdersetzst, gegen den ablaiß, fegefeur, bicht, messen, cloisterglobde und ander dingen offentlich disputeirt und geschriben, dar von ein groiß feur in Deutzlant uffgangen und eitz durch die ganse christenheit noch unleschlich brennet. Wie nuhe Sophia diß eirst jar swanger worden (fillicht umb den 3 tag aprilis oder parschen, wan daß untfenckniß gerade 9 monat vur der geburt gewesen, als ein volle tragt), hat sie im sommer mit swarem leib irß eirst kindes gen Aich ire bidtfart geleist. Christian vorg. ist am ende diß jarß uff thomæ eirst zu rhade erwelt. Und im anfanck deß neigstfolgenden jars ist innen beiden ire eirstes kindt geboren, und auff der tauff balt Herman genennet worden. Wie hie von in den folgenden verslin weither bescheidt zu vernemen ist.

 

De natalitio.

Secula ter quinque dum ter sex dantur et anni.

Maximus austriacus, medices leo suntque monarchæ.

Nascitur Hermannus quarta Weinsbergius hora.

Mane die solis decima natalis ihesu.

Civis Agrippinas homo liber in æde parentum.

A. patre Christiano ingenuis et mater Sophia.

Legitime primogenitus iacotique renatus.

Sol, annus, mensis, hebdomada, luna diesque.

Crescere cum puero simul incepere novello.

Foelix auspicium genesis foelicia signet.

 

Ehe dan ich weiters fortfare wil ich tipum beider elude Christians und Sophien allersidts voreltern sampt iren selbst brudern und sustern setzen, dis ortzs nit uneben komende.

 

 

[10']Auß dissem deliniertem tipo hat man augenscheinlich zu vernemen, wer Christians und Sophien der vorgerurter elude und jedes besonder fatter und motter, anherrn und anfrauwenn, vranherren und vranfrauwen gewesen. Das auch auff jeder seithen die zalle von neunen als veir brudern und funf suerstern uberein komen, Christian ist auff siner seithen der drit vor an, aber Sophia ist die dritte uff irer seithn am ende. Und ist in dissem ehestaidt die glicheit an vil orthen gerathen. Demnach wie bemelter Christian eirstlich Sophiam sin hausfrawe getruwet und vilfeltich zu den frunden zauch, uff heilichen, bruloften, kindtaufen, begenknissen, deilongen in ire geselschaft quam und die alte breif und siegel irer gutter las, wein, fruchten, weit und anders von inen galtund also samen conuerseirten und handelten hat er eigentlich nach siner und siner hausfrawen voreltern gefragt, iren stant, wonong, narung erkundjeden mit namen und zunamen umbstendiglich aufgezeignet. Dan dissen brauch und gewonheit hatten Christians forfetter uff in gelangt, das sie ire herkomstund gesclecht umb irer kinderund nachkomenheit willen ordentlich plagen in schriften zu verlaissen, von wilchem brauch er am geringsten nit wolt abwichendan hat groissen gefallen und begerlicheit denselben zu underhalten wie er mir sin gemoit darin oft erkleirt und befollen, dem glichfalls nachzusetzenund in sin und siner vorelter foisstaffen zu tretten. Darumb hat er disse anchen und uranchen alle mit fleiß vergaddert. In sinem leben hab ich sie auch mehe dan einmail abgeschriben und verwart. Er hat diss in sinen jongen tagen lichtlich ohn groisse mohe zu toin, do siner anherrn und anfrawen noch etliche in leben waren, die er seir wol gekantund mit innen umbgangen hat. Der vranchen hat er wenich gekant und dieselben nit eigentlich, aber dieweil sie kurtz da befor verstorben und domalß noch in frischer gedechtniß waren, hat er mit fleissigem nachfragen irer aller namen und gelegenheit eben so wol vernemen kunnen, als wan sie noch gelebt hetten. Und wan erß nit gethain hett sult es eitz zur zeit sweirlich sin zu vernemen. Dan ich Hermann hab in miner jugent auch selbst darnach geforschet und probeirt, das min fatter nit gefaelet hat. Dan ich hab selbst min anfrauwen Mariam Keppels und Margaretam Baichmans lange zeit [11] gekant und vil bei innen gewesen wilche der alten frunt stedich gewach hatten, da von ich es eben wie zu vor gesagt ist vernomen hab. dan sie wisten es wol von iren eltern, die sie im leben lange gehabt. Min uranfrawe Gutta Dorpmans war bei hondert jar alt. Wie sich im jar 1527 irer kinder und enkelen ungeferlich bei 80 personen, darunden ire gemaheln waren, vergaddert und uff den Steinen gen Neuss visiteirten und frolich mit ir waren, bin ich mit dabei gewest,also sie gesehen und ir waren, bin ich mit dabei gewest, mit ir gesprochen, auch hoeren rechnen, das uber 170 lebentiger kinder, enkel, urenkel und ururenkel von ir untsprossen weren. Es hat mir auch min obgenante anfrawe Maria Keppels gesagt, sie were duck zu Swelme bei iren swegerherrn und swegerfrawen Frowin von Weinsberch und Claren vom Doirholt gewest, vil von deren eltern abgefraget, wilchs sie mir weitleufich verzalt hat. Von iren beiden broedern, her Christian Keppel, canonico s. Georgen in Coln, und von Johan Keppel zum Spiegel an der Marportzen, hab ich auch fast verstanden, wer ire eltern und voreltern gewesen. Auch bin ich oft mit miner anfrawen eltern, mines fatters swestern bei unser alten moenen, jonffer Catharinen von Bretten im kloister zu s. Mauritio gewesen, welche darin profess getain hat, ehe dan das kloister reformeirt war. Disse hat auch gruntlichn bericht von Salman Vateins von Bretten, irem ohemen, kunnen toin. Zu Walberberge bin ich oft bei unsem ohemen Theis Gartz und siner hausfrauwen gewest, den min fatter sin weingewax jarlichs abgalt; der war obbemelter Margareten Gartzen jongste broders son und wuste wunder vil von den alten nit allein zu verzellen, dan auch mit breven offentlich zu beweisen van linien zu linien, wa her die erbgutter an sie quamen. Zu Dusseldorf im Swanen bei Reinhart Baechmans und Henrich Baechmans uff den Steinen, miner anfrawen Margareten Baechmans brödern, hab ich mit minen eltern duck in der herbergen gelegen, do si da an beiden enden ire lendereien mit iren mitgedelingen deilten und zu gericht gingen. Und von denen (horte ich vil), samt von anderen ohemen und mohnen, die von den elsten geschlechten binnen Dusseldorp und des orts her waren, als von den Groinwaldten, Steingern, Hamers, Pempelfurtz und deren mehe, man und frauwen, die von allen miner motter Sophien uranherrn und uranfrauen allerseitz und von iren kindern und ire gelegenheit besonder eigentlichen gutten bericht mit breifen und siegel und im schaitboich zu Dusseldorp wissten zu doindas dar an gar kein mangel oder zweivel war, sulchn [11'] bericht hie all anzuzeigen wie ich in doimals ingenomen hab sult hie zu lanckweilich fallen. Nuhe mach sulcher vorg. tipus maiorum indiciariorum mir sampt minen broeder, suestern und iren kindern wol angeneim sin, unse herkompst allenthalben fromer eheleuth glaubwirdich zu vernemen und zu wissen, der mir unsß nit schamen durfen, daß unß verwissen werde, mir weren von holtz oder steinen herkomen und nit von fleischs und bloidt erlicher leuth. Und ist sulcher tipus auch nit undeinlich, der alten unser vorfetter da durch zu gedencken, denen man ohn das fetterliche ehre schuldich ist zu beweissen. O wehe, o wehe, daß sulchs so wenich geschicht. Wie undanckbar sin viller kinder und nachkommen gegen irer vorelter groisse sorg, angst, arbeit und sweiss. Wilche nach untfangenem patrimonio iha irem gewonnen, geworben und nachgelassenen gut gar nitzs oder selten an sie gedencken oder sie, wie sich pillich gepurteereten.

Die namen und geburtzs jare mineß fatters und siner bruder und suestern hat er in ein alte bibel vor an geschriben, dar auß ich sie abgeschriben hab. Von miner anfrawen Marien Keppels eigen monde hab ichs auch gehort und angezeignet, und stimpt das einß uff das ander, die tage der gepurt hab ich nit her zu willen setzen, het den tipum nit gezeret. Aber die namen miner motter bruder und suestern hab ich von ir wol verstanden, wiste aber die geburtzs jaren nit eigentlichen dar zu thoin. Doch hat mich min neiff Christian Korth einen pergamenen zittel laissen sehen, den ich zum teil abgeschriben, wilcher Herman Korth, zolner zu Dormagen mit eigner hant zeirlich nach ordnong aller siner kinder, was jars, tags, und stunden jedes kint geboren und, wer sin taufpatten und gotten gewesen, geschriben. Dissen zittel hat eitzbemelter Christian in sinß fatterß minß ohmen zu Woringen verlassenschaft funden und wirt in noch in verwarung haben.

So vil dißmal von beider Christians und Sophien eheleuten voreltern sampt bruderen und suestern. Der vorelter bruder und suestern auch deren kindern kan ich zu allen seiten keinen gewissen bericht haben. Aber von mineß fatterß und motterß suestern und bruderß kindern will ich hernach geleibs got kurtzlich meldong thoin.

 

Da ich oben etwaß angeregt von den schoenen namen miner eltern, daß dar an wol zu gedencken und net allein nomine, dan re zu folgen were, so mogten von mir folgende verslin wol gesagt werden.

 

Gaudeat Hermannus de Weinsberch quod sit adeptus.

Nomine Christianum patrem matremque Sophiam.

 

Deus Hermanno Weinsbergio præsit, 1518.

 

[12] Will man aber deß datums und jarß miner geburt und widdergeburt lichtlich erinnert werden, das mach durch folgendt deutzschs aveiß oder rheim wol geschein, da emans dieselbe behalten wulte.

 

Man schreif funfmal dri 100, einsedrei 5, drei 1mehe.

Do Herman Weinsberch ist, eirst worden heidt und christ.

 

Die zallettern sint und beduden 1000 tausent, 100 hondert, 50 funfzich, 10 zehen, 5 funf, 1 einß. Die alten haben auch des 500 oft vur funfhondert gebrucht, gilt bei etliche aber in den latinischen versen nit. Diß setz ich, damit nit geirret werde.

 

Dan ich hab drei verslin gemacht inß gemein an jeden, da auß jedem die vergadderte zalletteren den datum und jar mineß geburtzs tag anzeigen sin latinischs. Und glichfalß drei verslin an daß hauß Weinsberch ghainde. Ob ich dem fillicht einige ehr, nutz und forthel mogt erzeigen, daß miner da im guttem gedacht wurde. Wil die sex verslin verscheiden setzn und lauten wie nachfolgt.

 

Nasceris Hermanne, de Weinsberch, ecce vocaris.

 

In Weinsberch nascor, Hermannus dicor et ecce.

 

Hermannus Weinsberch tibi nascor et ecce renascar.

 

O Weinsberga domus nascor tibi cresco sed ecce.

 

Clara domus Weinsberch tibi nascor planta renascens.

 

Ecce domus Weinsberch tibi nascor ad astra renascar.

 

Nota. D in quolibet versu non numera bit?

 

Wie ich bestimpt jar 1518 den 3 tag janvarii geboren sin, wart im hauß vor ein selsam neuwe merhe gesagt, mir haben ein neu jar, einen neuwen monat, ein neu licht, ein neu wegh, einen neuwen tag, ein newen fatter, ein newe motter, ein neu kindt, ein neuwen heiden, ein neuwen christen, ein neu sohn, ein neu enckel und deß dinges mehe. Darumb ein neu wech, dan er war sontag und der zehendte tag nach christtagh.

Uff der h. drei konincktag den 6 janvarij, als ich geteufft wart, waren im hauß Weinsberch umb diß stunde acht manß personen alt und jongk gewesen uff einmaill, die alle Herman heischen. Daß man auch vor ein seltzam geschicht achte und hilt, numerus aureus. Der gulden zal ist diß jar 18 gewesen wie minor numerus dati huius anni. Prima dominicalis ist 100 gewesen.

Diß jar 1518 hat Carolus der eirste geborner koninck von Castilien oder Hispanien viß dem oisterischn stam von der [12'] einiger dochtern deß koninckrichs in Africa ein groisse victoriam gehat, das er veirzich tausent barbaren erschlagen und ein stat erobert, da innen groissen schatzs bekomen und sinem anhern keiser Maximiliao zwein kostliche fahnen zu geschickt hat. Sunst wardiß jar in der christenheit kein besonder kreich mit dem swerde, dan allein im Gellerlande bei Venloe sin etlige lantzknecht (die viß Freißlandt komen und uff dem haußman lagen) erschlagen. Aber auff dem richtagh zu Auspurgh war groiß streit mit Martino Luthero, also daß die feder gebrucht und vil disputerens war. Auch hat unser her und got gekriget, dan in Coln der stat war sulch groß sterbde und pestilentz, daß alle gerichter und hohescholen geschlossen worden, daß man auch die sieven silber kassen der patronen neben dem h. sacrament umb troge, dar nach es balt uffhort sterben. Es hat auch dißmal der newe koninck von Franckrich Franciscus Valesius nach absterben deß forigen konincks ohn leibs erben nevlich hie befoir das hertzogthumb Meilain ingenomen, da her ein groisser kreich zu besorgen stunde.

 

Eo der zehendt romischer pabst, deß geschlechtz de Medices.

Maximilianus der eirste rom. keiser ertzhertzoch van Oisterich.

 

Lodowicus koninck zu Ungarn und Behem, erbschenck.

Albertus ertzbischof zu Mentz, marckgraf van Brandenburg.

Hermannus ertzbischof zu Coln, ein graf von Widt.

Richardus ertzbischof zu Treir, einer von Griffenkla.

Lodowicus pfaltzgraf bei Rhein, hertz. zu Beiern, erbtruchseß.

Fridericus hertzoch zu Saxen Meissen Doringen, erbmarschall.

Joachim marckgraf von Brandenburch etc., erbkamerer.

 

Iohannes der 4. hertzoch zu Cleif grave zu der Marck hat vorwenich jaren Mariam, die einige dochter deß lesten hertzogen Wilhems von Gulich und Berge gravens zu Ravensburch zur ehe bekomen und da mit zur ehesteur die landen sampt Hensberch und mehe erlangt.

 

Goddert Kannegeisser, elste burgermeister, anno 1518 joannis.

Johan von Aiche, jongste burgermeister, anno 1518 joannis.

Gerhart vom Wasserfaß der alte.

Arnoldt von Bruwiler, rentmeister.

Conradt Schurfeldtzs, alter burgermister daß eirst jar 1517.

Adolf Rynck, alter burgermeister anno 1517 joannis worden.

 

Henrich von Krufft, geweltrichter.

Laurentz Swartzenberch, geweltrichter.

 

Christian von Weinsberch, min fatter ist diß christmiß in sinem eirsten jar sines raitzgancks brantmeister neben sinen gesellen gewest.

 

[13] Peter Fuystgin van Duren, pastor sant Jacob in Coln.

 

Iohan van der Strassen, zum Hirtz unden uff der Bach.

Goswin Wolf zum Sternen uben uff der Bach.

Teil Grevenstein uff dem Weitmart gegen Gulich.

Paulus von Sichen zum Oberstoltz unden uff der bach.

 

Hie bei wil ich es berauwen laissen uff dismal, und versehen mich da mit sol min geburtzs tagh uberich gnogh specificeirt einkendich und namhaft sin.

 

Als vorhin von der zeit und wilche leude do gelebt vermelt worden und undekeim, were der geburtplatzen zu verswigen. Derhalb wil ich daß hauß Weinsberch mit allen sinem zubehuir und beigelegen haussern wie sie in einem cricel bei einandern ligen mit der federn vur die augen delinieren, abmalen, und dar stellen. In dem oisten ad Altam portam, uff der Hoeportzen. In dem westen neigst dem hauß zum Weitkoichn genant. In dem suden und mittage vor heubt in ripa uff dem over der bach neigst dem Weidtmart gegen sant Jacob und dem huiß Gulch uber. Vur dem huiß Weinsberch ein breide bruck und dan noch zwein kleiner brucklin, hab_ _de _en dem orde ein steinen arkir, dar durch die bach fort plat fluist, hat eine schein weite straiß und guite lufft. In dem norden hinden langs alle die heusser gehet die gaß der Krom buchel genant vol van heussern mit dem hauß zum Stommel an der Hoeportzen hin uff zu zwelfen zu, die alle bewont werden. Und ob ich wol daß hauß Weinsberch uff andern orthern besonder wie es mit allen zubehuir und inwendich mit bau und platzen geschaffen war, so will hie damest deß gantzen umbkreidtzs wie jedes uff zit miner geburt und mitler zit geschaffen gedencken und jedes hinden an mit sinen lettern und boichstaben in sonderheit bezeichnen, in gestalt wie nachfolgt.

 

 

 

Ich moiß vom westen zu dem oisten komen, sulchen orden umb deß alphabethæ willen halten. Dan da daß a steit licht ein ledige hoffstatt, ist jeder zit in minem gedenken vor ein moiss- oder kruitgarde gebraucht worden. Wan das geheusse verfallen oder verbrant sie, da von hab (ich) nehe etwas kunnen vernemenwirt vor vil jarn gescheit sin, hat vur ein hultzen britz, licht neben eim haus zum Weitkoichen, das nach den Wissen Frawen wart licht, schuist hinden uff die keir vom Buchel, gegen der gassen, und man sult lichtlich ein straiss dardurch machen. Ein ersam rait hat etlich mail die kronen druff laissen sclain, wultens zu sich nemen, aber es gehoirt [13'] uff einen elter zu s. Laurentio, ob es derhalb verhindert wirt. Diss hofstat oder hoffgin hat Gotschalk und Marie, mines fatters eltern, vorhin in der medong gehat, und als min frewe Marie widwe war umb die zit miner geburt, hat es Maes van Bracht zu Zwen Tuben hinden miner frewen her ir uis den henden gemeit und gebrucht, und van Maes ist es bei sinem son Lenhart van Bracht pliben, der es cr. A. 1560 miner suster Marien und irem man Peter Ordenbach uberlaissn hat, galt jarlichs sess mr. zins; folgens hat es min suster Marie von den kirchmeistern s. Laurentz vur 2 rad. gl. erflich angenomen und siegel und breiff darvan bekomen und gebrucht es eitz vor erfschaft.

 

 

Disse zwei huisser B und C neigst und neben der vorg. hofstat gelegen sin in meiner zeit einherrich gewest, und hat sie her Gotschalk van Rhade, officiant und capellan zu s. Jacob uff zit, wie ich geboren bin, beide besessen, der sie von sinen eltern ererbt hatauch dieweil sie domalß seir alt waren vor am giffel der do mit ubersprongen waß mit swartzen bredern bekleidt hat er sie understanden zu bauwen die maur neigst der hofstat uffgefort und neu balcken drin gelacht. Dweil er aber nit geltz gnoich hat, leiß er daß tag und gansen bau anstain. Disser her Gotschalk hat mit siner magt fast kinder. Damit er die zu bess erneren mogt, hinck er an dem einen haus neigst der hoffstatt ein bret aus mit eim rosenkrantz, daher das haus und er zum Rosenkrantz genant worden, und hat hinden ein roddel vor linentoich uffgericht, vor ein greiffen und fet pars, da mit er sich ernerte, war ein seir gut man und nachpar, bestatte folgens sinen son Wolter und satzt den in das ander haus, der cr. A. 1534 starb, darnach vermeite er das haus vur und nach andern. Disser her Gotschalk wart folgens vicarius zu s. Georgen, ein seir alt man, starb A. 1554 und licht s. Jacob under dem klockentorn nach s. Joris wart begraben. Darnach (erwarb) min swager Peter Ordenbach umblaufund min suster Marie van Weinsberch elude die beide heusser, nam den vorigen bau zum besten und bawte sie sonder uberspronge newewie sie etzundt sint, und vermeitte sie doichscherern und andern leuten bis uff heutigen tag,. Wie disse zwei heusser im schrin genant sin, mach man viß miner susteren werschaft vernemen, und hat hinden dem Rosenkrantz an dem Buchel einen putz stain, daruff der neigste nachpar geregtigkeit zu putzen hat, ich eitz auch als ein miterb zum teil.

 

 

Das hauß mit dem D verzeignet ist gelegen tuschen dem obg. hauß und den folgender zweien heussergin. Hat im schrin keinen namen mehe dan daß es eirst zwei, darnach drei heusser under einem tag von alters gewesen, eitzst ein hauß ist, do ich anno 1518 geborn sin Conrad van Eupen schartzeweiffer und Greten zustendich gewesenund von innen bewont worden und wie Conrad dol worden und gestorben ist, hat Paulus van Cube die witwe Gret Conrads getruwet und ohn kinder ir gut testamentsweis behalten und nach irem toit Weisgin Ripgin getruwet, damit zwein son gezilt, das haus repareirt, einen newen keller drin gemacht und s. Paulus uff das bret gemailt, daher es Paulus haus in miner zit genant ist worden; und haben schartzen gemacht, tapit zeichen zu Frankfort feil gehat und sich ernert. Und wie er A. 1547 Decollationis gestorben, kirchmeister gewest [14] und s. Jacob begraben worden, hab (ich) die widwe Weisgin Ripgin van Neuß zur ehe bekomen, das haus 2 jar bewont, darnach Johan van Woringen schartzeweber und Trinen eluden, auch Peter vam Rhade scharzewefer und Feien eluden vermeit, die noch darin wonnen. Und als min hausfrau gestorben, hab partund dheil dran bekomen, hat hinden ein hoffgin und uisgank neben dem haus zum Torn und gank uff den putzund steinen maur am Buchel, die Paulus und Weisgin dar gebaut haben in stat einer britzen, war vorhin scheir ein hultzen leimen hauß, doch der hinder giffel alt steinen gewest hart widder dem thorn zum theil. Ist doch zimlich breit und weit von binnen.

 

 

Disse zwei kleiner huisser ligen tuschen Paulus huiß und dem Hirtzs, haben hinden kleine steinwegelin biß an daß huiß zum Thorn und hofgin zu Weinsberch. Weiß von iren namen nit binnen noch buissen schreinß.

Wer vor alters in dem E gewont, ist mir unkundich, doch gedenkt mich, das ein mutzenstricker drin plach zu wonen. Folgens hat es Paulus van Cube und Weisgin gemeit und gebrucht, ich auch mit bei Weisgins und miner zit, jars vor 5 gl. cur. Darnach ist ein faßbender, Herman Quinckert und andern drin komen wonen. Das ander F hat uff zit miner geburt m. Johan van Olpe schroder und darnach fil jare bewont. Dess dochter Greitgin Olpe, miner motter magt, hat sich mit mir versellicht, davon min dochter, suster Engin, geborn ist.

Disse zwei heusser sin vor miner zit und noch bei dem lic. Helman und sinen voreltern gewest. Vor 34 jaren het ich sie beide wol vor hondert goltgl. kunnen bekomen wan ich gewolt het, so unwerdt waren sie.

 

 

Diß hauß licht tuschn den vorg. zwen huissern und der alter Duven, schuist hinden mit sinem steinweglin uff daß hinderst hofgin zu Weinsberch. Man hat es zum Hirtzs oder Honkeshonen hauß genant. Weiß nit wehe im schrin, hat verscheiden herren und inwoner gehat, ferber Vitt, zinmerman Werner Schroder, deß widwe eitz drin wont.

 

 

Diß hauß hat vormalß zwei theil gehatt, ist breit, licht tuschen dem Hirtz und zwen Tauven, hat hinden ein smal kurtz steinweglin tuschn dem stal zu Weinsbergh. Uff zit miner geburt mach es Peter Beckhuisgin bewont haben, der ein blaferber wardem es zugehoirt hat. Als dem sin frawe gestorben war, die ich seir wol gekant, hat er sin magt Clara getruwet. Als er verstorben, hat Clar einen blaferber Peter Waltfuicht zur ehe genomen, die folgens am Maltzbuchel wullen geferbt und verdorben sint, uis Coln zu Dort komen wonen. Die vorkinder haben das haus Gillis van Duren und Trinen van Woringen eluden, minen hausluden in Paulus haus verkauft, die drin gewont, schartzn gemacht und wont sie noch darin, eitz witwe ires dritten mans, mit irem son Hilger van Duren und sitzen in gutter narong. Diss hausheischt zur alter Duven, mach fillicht im schrin auch also heischn wa ich recht verstanden hab, ist gar alt van gebewe, das ein leiendecker eins durch das leitag gefallen ist.

 

 

Hie ist zu wissen daß die zwei heusser I und K vor 300 jaren ein hauß gewest und Melremanß hauß van Christgin Melremans den namen bekomen haben, wie sich clarlich im schrin zu Arsberch in lib. porta Panthaleonis anno 1223 und darnach befinden sall. Und mogen circa annum 1320 zwei heusser dar von gemacht sin, also daß daß I den namen Melreman behalten, aber daß K do eirst Wenemars hauß genant worden ist, wie da zu vernemen und zu vermothen. Und ist Wenemarß huiß anno 1377 durch Johan van Weinsberch an daß hauß Weinsberch pracht worden und 200 jar und noch dar bei pliben. Vide in lib. porta Pantha. zu arsberch.

Nu daß Melremanß hauß mit I verzeichnet [14'] , gehört seit alters zum Hause Weinsberg. Ist 200 jar ein abgesondert huiß vor sich gewest und folgens zu zwen Duven genant worden. Anno 1518 do ich geboren sin hat es Maes van Bracht, blaferber, raitzman und kirchmeister zum eigentumb besessen und bewont. Licht neben der alter Duven, ist folgens uff sinen son Lenhart van Bracht geerbt, von dem der eigentum uff minen broder Gotschalk und sin hausfrawe gefallen ist umb unbezalung siner faren, dan bemelter Lenhart blaferber war alt und narloiss und verdarf, hat auch kein kinder bei leben.

 

 

Von dissem K und Wenemars vide proxime supra, daß ist vor 200 jaren bei dem hauß Weinsberch gewest dar es hardt neben licht. Aber ist uff zit miner geburt und darnach etliche jar abgesondert bewont und vermeit worden. Vur 50 jaren gedenckt mich daß ein fasbender und min scholgesellen drin wonten, aber min fatter hatzs sint dem tag zu dem hauß zu Weinsberch laissen pliben.

 

 

Daß hauß Weinsberch, mit L diß ortz bezeignet, ist daß principal in dissem circk, hat das heubt vor allen daselbst uffgestreckt. Da von ist in minem gedenckboich der jarn sub anno 1521, fol. 12 die gestalt beschriben und sunst uff mehe orten. Derhalb wil ich es hie bei dißmal pliben laissen.

 

 

Daß M ist vor 200 jaren ein backhauß gewest und hat den namen im schrein behalten. Ist ein seir alt onbuwich hauß, schuist hinden widder Cronenberch, licht hart neben Weinsberch das nederst von allen vorg. husern. Ich hab es aber zwa illen zu neder gemailt, das man Cronenberch bess mogt erkennen. Hat Peter van Eupen becker und Trinen eluden van der zit ich geboren bin zugehoirt, die vil kinder drin gezilt haben, alle verstorben, und ist daß hauß folgens in frembde hende komen an Wilhem van kleinen Broich becker und sin hausfraw, die noch dar innen wonen.

Diß hauß hett min fatter wol einß die besserei und eigenthoumb vur 10 goltgl. kunnen haben, so hart ist er mit fharen besweirt. Daß theil 1000 ist von alters vermeit worden buddenbender, essichmenger, schartzeweffern und barscherern. Aber daß N ist steitzs vor ein backhauß gebrucht, daß hinder dem Zynßhuyß m her ginge.

 

 

 

 

Das P war ein smal hausdoch etwaß hoher dan daß o, und von alters wonte ein alt bussenmecher drin, war ein gut weindrenker, darnach ein schartzekremer und ein alt weib. Aber folgens umb das jar 1554 galt Goddert Peschs beide heusser am eck, O und P, warf sie ab und bawete ein hoich hultzen haus zirlich in die stat, und ich hab im 20 gl. zu behoif der mawren.

 

 

Disse beide heusser Q und R scheint daß sei viß einer hant gebaut sin und daß sol wol vor 300 jarn gescheit sin. Daß Q hat den carmeliten vor 200 jarn zugehort und von dem R gewesen. Daß ich von den carmeliten bekomen. Daß R hab ich von Wilhm Waltneil gegolten, haben beide den namen vor 300 jaren von Henrich Vuilappel im schrein erlangt. Vor minem gedenken hat Henrich van Hilden dreisler im Q gewont und Volmer Dodentroister [15] in den R im winckel, beide an der Hoeportzen gelegen mit den leitager langs die straiß und hinden langs daß Backhuyß dogen beide nit vil, ist mir aber die gelegenheit nutzs bei der handt und wendt hie das kirspel s. Jacob und Arsberch an dem orde. A. 1585 uis beiden ein haus gemacht und zur Trauben gnant.

 

 

Mit dissem S endt sich s. Peters kirspel und schrin. Oder es fengt da mit an. Dis s ist vor ziten, do ich geborn, ein besonder abgesondert haus van Cronenberch gewest, dem alten Arnt Schoben snider zustendich, den ich gekant hab, do er blint was, eitzhoirt es zu dem hauß Cronenberch, dar zu es Henrich Lutzekirchn kesselscleger und Barbar van Gladbach elude vergaddert haben. Ist der gaddum und stobe van dem haus Cronenberch. Ich glaube, da diss klein haus eitz steit, eben uff der platzn hab der alt torn van der Hoeportzen gestanden, dan es geit vor andern etwas uff die strais. Diss haus gehoirt eitz min.

 

 

Diss T steit etwas zuruck langs den Buchel hinden an den hoff zu Weinsberch scheissende, hat nit vil gemachs,. Dan es ist nit groiß. Wan das S nit darzu gebrucht wurde, sult man sich ubel drin behelfen konnen. Ich hab diss T und S von der widwen Barbarn (von Gladbach) gegoltenund bewonen sie beide, und uff zit miner geburt sint sie auch beide von Henrich Lutzekirchen und Barbarn von Gladbach bewont worden Vor dissem haus steit ein birgelgin, drei tritt hoichauß dissem hauß geit man zu Weinsberch eitz viß und in an beiden enden, wie man wil. Daß Weinsberch durch Cronenberch und Cronenberch durch Weinsberch zirlich und herlich gemacht wirt.

 

 

Daß hauß V zum Torn genant licht hinden uff dem krommen Buchel in sinen veir brantmuren, licht hoich, wiewol es klein und enge ist, tuschen dem klinen hoffgin zu Weinsberch und hoffgin an D oder Paulushaus, daruff es ein dur hat gain. Ich hab es von Vito Odendal a. 1548 gegolten und zu beiden seiden durren durch gebrochen und bewontehe ich breif dar van bekomen dan der Vit starb im selben jar. Ich hab aus Cronenberch durch dissen Torn in Paulus haus gangen, und eitz hat es min suster Sibilla innen.

 

 

Das X ist kein wonhaus, dan ein wirkhaus, sclachthaus, binthaus, bruhaus, ferbhaus, stall, holzhaus und warzu man es brauchen will, licht in s. Peters kirspel, wie auch t und 5 Cronenberch und Thorn mit drien hoifgern und dem gange uff den putz hinder b, oder Rosenkrantz stainde, also daß die mauren van einem orde zum andern sich den gansen krommen Buchel langs uff einer siden ganß und gar erstrecken, dar an ich allenthalben beregtiget sin.

Diß hinder gehuise oder alte gebewe langden Buchel zwischn Cronenberg und Thorn ist wol uber 200 jar zu dem hauß Weinsbergh gar fridlich ohn alle becronong gebrucht worden, aber man findt doch im schrin zu Arsberg nit, daß es zum hauß Weinsbergh gehoere, daß doch dar zu gehoirt. Daß kompt also zu, daß die schrinboicher zu Arsbergh wenden von der Neuwer stat biß an die Alte maur. Waß aber binnen der Altermuren in der Alter stat licht alß daß hinder gehuisse Cronenberg, Thorn und die 3 hofger, gehoirth in s. Peterß kirspel, und inß schrin Petri, also hat daß hauß Weinsberg und Wenemarß, die von baussen uff die alte maur schlissn, im schrin Arsberg niitzs vom hinder gehuisse. Diß zeichnen ich hie zu gedechtniß an, off man sich irren wurde. Man hat uff diß stunde noch kein foiß oder geschricht vom hinder gehuisse, daß ich oder min fatter oder fatterßfatter ehe hat vernemen kunnen. [15'] [16]

 

 

Anno a nativitate christi 1518 auff sontag den dritten tag janvarii seu nons desselben monatzs den 10 tag, nach christag umb die 4 stunde oder vre des morgens vormittage pabstumbs Leonis decimi in sinem 6 jare, keiserthumbs Maximiliani primi sines 31. und lesten jares, ertzbistombs Hermanni von Widt im 3 jare siner erwelung zu Coln, in der 6 indiction oder romer zinßzal, ist Herman von Weinsberch siner eltern Christiani von Weinsberch, genant von Swelme, und Sophien Korth eluden eirstgeborner naturlicher eliger son, menlichs kunne, fries standes, gutter gesontheit und wolgestaltes leibs, im haus Weinsberch auff der Bach bei der Hoeportzen in der underster kamer (circa locum loci forte erravi, male memini)zu hof zu in s. Jacobs kirspel der reichtsstadt Coln uff dem Rhein geboren.

 

Und glich darnach im selben jar und manat den 6 tag janvarii auff epiphaniæ oder der h. drei weisen oder konincktag umb die 3 stunde nachmittage, ist er mit dem silber und waxkertz offentlich und statlich mit der frauwen procession in die kirch s. Jacob getragen, da von herrn Petro Fuystgin dem pastor gesegnet und geteufft. Johan Keppel und Herman Windteck sin beide ohmen waren sin tauffpatten und Margreth Baichmans sin anfrewe war sin tauffgoette. Und ist nach siner motter fatter Hermanni Korth (so lang thoidt gewesen) Herman genent.

 

Als sin eltern im somer umb der groisser pestilenz sterbten zu Dormagen mit im flouwen und daselbst lang verpliben dweil kein narong in der stat war, ist Herman am ende des jarß von einer erbar haußmans frawen Marien Lenhardts in stat einer ammen meistheils gesuget und gespenet.

 

Anno domini 1519 im quatertemper nach eschtag ist er vor dem hauß Eberßheubt auff dem Heumart (da sin eltern daßmal wein zapten) gefirmpt. Sin ohem Theis Gartzs von Walberberge im Vorgebirge wonhaft war sin firmbpatt, und sin moen Stein Pampus von Gontersdorf woischs im den firmbeudel aff.

 

Im sommer diß jars ist er an den ruddelen seir swach gewest, die im uber daß gantze leib und angesicht branten, aber balt genesen und da von auffgestanden.

 

Im selben jar wie in ein deinstmagt uber die straß am Maltzbuchel troge, ist sie mit im widder einen unckelstein gefallen, daß hinden am heubt und oben am gehirnß ein groiß loch und wunt hatte. Und wie man sagt, solt im sulche letzung an siner memorien und gedechtniß nit vil forthelß gethain haben. [16']

 

Den 14 decembris diß jarß ist im sin eirste suster Maria geboren, under zweien diß namens die eirste, die doch nit dri jar lebte.

 

Anno 1520 den eirsten tag novemb., alß keiser Carl der funfte diß namenß zu Aich gekronet war und von dannen zu Coln gar herlich ingeritten quam, hat in Herman sehen inkomen, do er in siner eltern hauß in einer finster uff dem Heumart van einer frauwen, steffen genant, auß der Bechergassen gehalten wart, daß der Heumart durch auß vol ritter und perde war. Diß war sin allerlengste gedencken van kindtzs uff, do er noch nit aller drei jar alt war. Und dweil von dissen kostlich inridt oft geredt wart, beheilt erß stehtz in sinen gedancken, und umb der verfrischung willen vergaß erß nehe zitzs.

 

Anno 1521 den eirsten janvarii hat im sin anfreu Margreth Baechmanß zu Dormagen und sin tauffgoede ein blawen rock und roede bonnet gegeben. Und war seir nach ein von siner allereirster kleidongen gewest, solten silbern knouff vor und an den mauwen gestanden haben. Diß hat in wol gezeret, daß sin motter ein freude und lust im kinde hat, dan er war follich von leib und hat gel hargin, daß es im wol anstunde.

 

Am 14 tag augusti ist im diß jar sin sustergin Drutgin geboren, das er gewieget und doch nit vil uber ein jar behalten hatt.

 

Diß jar sint sin eltern vom Heumart der wonong halber auff die Bach zu Weinsberch mit im und sinem sustergen gefaren wonen. Dan sin fatter hat sich mit siner mottern und beiden susteren (die nevlich bestattet worden) vertragen, daß er ir vorelterlich hauß bewonen und zum eigenthumb haben sult, und darvon geben und dhoin vermogh irer verglichungh.

 

Umb diß zit ist Herman auch der kinder leuß also zinsich worden am leib und uff dem heubt, daß sie im ubel zu vertriben waren.

 

Anno 1422 ist Herman und sin beide sustergin Marie und Drutgin an den kinder pocken kranck gewest. Und wie sie in den hontagen groisse hitzde und quael erlitten, sin beide sustergin dar von gestorben. Herman aber ist seir ungedultich gewest und groiße gefhair gestanden. Ist aber mit dem leben dar von erloist worden.

 

Auch ist Herman diß jar an den wormen im leib seir ubel dran gewess, die im oben und unden abgingen. Wolt nit worm krut essen, daß im sin fatter wolt ingeben, derhalb er in bedrewet, wa er daß nit inneme, so moist er in die swartze erde faren. Deß in sir lange gedacht hat. [17]

 

Diß jair hat er auch hinden im hauß Weinsberch am putz gain spilen. Und wie die megde schoirten, ist er uber ein budde mit dem heubt inß wasser geschossn, deß die megde nit gewar wurden. Und zu allen gelucke hat sin fatter maltz gewant, sach in oben zur finster auß in der budden stechen, hell mordeio schriende, daß er also ausgenomen wart und war seir nach im wasser verdruncken.

 

Anno 1523 umb pingsten ist er mit sinem fatter auß Coln nach Dormagen gangen, da hin sin verlangen zu den lemmern, schaiffen, gensen und hoenern, auch tauben und anderm fhee und foegeln war. Dieweil er nit vil uber funf jar alt und mode wart, hat sin fatter zur vorsorgen einen hultzen kloitz mit genomenn, den er her vor zouge und warf also einer nach dem andern vor sich, biß daß er in uber den wegh bei drittehalb meil bracht.

 

Er hat umb disse zit vil auß der nasen gebloit, daß sich nit wol stillen laissen, waß rhaitz man pflegte, er moist oft im keller umb der koilden sin, und dauret diß etliche jare.

Auch wart er lichtlich schamroit im angesigt, wan er angesprochen wart, oder emans ansprach. Und ware seer bloede, daß sin fatter ein halb unlust dar zu hadde, dar auß gut zu ermessen (wie etliche judiceirten), das er sanguinischer complexion meistheils sult sin.

 

Am eirsten tag septemb. diß jarß ist im sin suster Maria die ander diß namens geborn, das er darnach widder geselschaft im hauß hatte.

 

Anno 1564, als im fastabendt zu Weinsberch wein in den keller worden gedhain, fheile der kellerboum hardt langs in, daß im die scholter gerurt wart, und solt also umb ein spanne nach dhoit sin pliben doch hat in got alles behutt. Wart umb diß zit gar wacker und mestich, drumb er von den eltern oft gscholten und gesclagen wart.

 

In dissem jar auff sant gregorii tag, den 12 marcij, quam er eirst auff die schoil, s. Georgen, leret sin abc von meister Anthonio Wipperfurdense, damit nit stetich uff der straissen durft lauffen.

 

Anno 1525 in der fasten quadragesimæ hat er in der kirchen s. Jacob neben andern schoeleren bei h. Johan Weber von Smalenberch dem capellain eirst sin bicht gethain, und fort bitten und bichten gelert.

 

Den lesten julii diß jarß ist im sin suster Catharina geboren.

 

Dissen sommer hat er eirst broichhoesen, wambiß und kurtze paltrockeln getragen. Und sin fatter wolt, daß er sich ront umbher stetich inß leif binden moist.

 

Diß war ein seir uffrorichschs jar, in vil landen, das [17'] in Deutzlandt wol hondert tausent bauren ersclagen worden. Preussen fiele ab vom deuschen orden.

Zu Coln Mentz und Franckfort waren auffleuff. Die schoeler und kinder in Coln kreigten samen und ermit innen. Man sanck, im leede, es sult ein baur ein wirtschaft halten, der ein, der solß dem andern sagen, einen swern speiß tragenn, ein armborst haben. Iha iha iha iha iha. Herman und ander kinder songen alß mit.

 

Anno 1526 wart er inß Backhauß neben Weinsberch geschickt, weck zu hoelen. Mit dem schoiß Peter von Berchem, im ferbhauß neigst der Carmeliten mauren wonhaft, nach einer krahen, die uff der drencken saß, daß im dasß bussenloit roerenß langs den kopf durch ein zinnen schottel trang und in der want stechen bleib. So nach warß im widder.

 

Wie diß jar sin ohme her Christian Keppel canonich sant Georgen verstorben, hat er in sampt andern schoeleren helfen begraben. Licht im umbganck daselbst, wonten tuschen der probsteien und cloisterportzn, ist duck bei im mit sinen eltern gewest.

 

Als sin eltern und ander frunde von Collen, Woringen, Ichendorf, Dormagen uff die Steinen gen Neuß wolten faren, sin vranchfreu im alter zu besoichn, saß Herman mit uff dem wagen und sach vor Dormagen uff eim differ graben neben dem wege ein klein menlin und frevlin gaen, die nit einß foiß hoich waren. Alß er diß sagt, sprachen etliche, daß weren dwerge gewest, dan deß ortz am Hoemberch hetten sie iren unthalt vor menschen gedancken gehatt.

 

Umb diß zit sol er auch einen oberbruchlin an der rechter seithen gehat, wilchen sin motter sagte were im von ein fetter falter zoppen herkomen. Hilt sich doch in der jugendt zimlich, deß moist er sich fast in hosen binden.

 

Anno 1527 hat er ein gebrech im monde gehat, daß sie den schuirmondt nanten. Daß faul fleish umb die zende sneidt im der barbeir am Maltzbuchel mit der scheren ab. Nam im auch vil zende auß dem monde, die im doch folgenß widder woissen.

 

Uff mendeldach diß jar hat er eirst zum hilligen sacrament gangen, daß leib und bloit christi zu sant Jacob in der kirchen untf., alß er im zehnde jar ginge.

 

Den 26 julii diß jarß ist im sin suster Agnes gborn.

 

Anno 1528 biß her zu hat er uff der schoelen sant Georgen donatum, dominus quæ pars, catonem, poeniteas cito, alexandrum grammaticum geleirt und gehort, so war nemlich ein schoele uff sant Loen capeln uff der Santkuylen uffgericht, da lerte er under meister Henrico Imendorf und meister Goddert Wulfrade grammaticam jonis dispauterij, bucolica virgilij, evangelia, finge an latin zu sprechen, und epistolas zu componeren,

 

[18] zu disser zit hat im sin fatter einen rosetten paltrock machen laissen. Hat vur der borst und uff dem rucken smale falten unden deiffe falten am schortzs. Er was domails noch allem der leibste sohn.

 

Diß jar ist er zu Weinsberch in den keller gefallen von oben an biß unden auß und sich seir wehe gethain. Dan wan er nit zu scholen ginge, wart wein gezapt, so macht in sin motter zepper, wart nit gezapt das sie span, so moist er haspelen. Sunst bedreif er uff der strassen leckerei wie ander jongen.

 

Anno 1529 hat ein mail widder sin natur keiß willen essen, in den mondt gestechen und versucht, da von er wol acht tage kranck gewesen. Hat in nehe kunnen leren essen. Sunst alle ander gutte speise genossen, wiewol er in der jugendt vil verzarter mit essen war, dan do er haußgehalten, ob er fillicht nit vill hongerich gewesen.

 

Diß jar hat sin fatter vill im hauß Weinsberch verandert und gebaut. Und hat der bau ein klein kemergin geben, das er ingenomen und zu sinen studorio zugerust ist sclossich gemacht.

 

Gegen den herbst quam gehelich ein newe unbekante kranckheit in Coln, der engelßsweiß genant, dar von in kurtzem vil minschen storben, also daß sin eltern in und die kinder mit sich zu Dormagen namen.

 

Am 22 novemb. diß jar wart im sin broder Christian geborn, und war Herman nuhe der sohn allein nit mehe wie zu vor, wiewol in sin fatter ubertreflich leib hat.

 

Anno 1530 wart sin schoilmeister Henricus Imemdorpius mit der schoelen zu s. Albain versehen, daß die schol van der Santkuylen da hin in ein ander behausung dar gegen uber verruckt wart, da ginge Herman auch schoelen. Aber es geschach daselbst ein ubelthaidt, daß ein meister den andern und kostgengern venein inß moiß und duppen warf, dar an etliche storben, da durch die schoil widder zu ruck ginge.

 

Gegen den herbst diß jarß schickte innen sin fatter uff das Meinfeldt hinder Andernach zu Saffich an Ackerjohan daselbst waß anzusagen von wegen der gefeurter wein. Und foir darnach zu schiff nach Coln, sin wecken zopte er in den rhein und aiß sie, den knapsack bracht er zu hauß wie in im sin motter mit geben hat, fleisch noch botter drauß gessen.

 

Anno 1531 den 5 tag januraij, wie Ferdinandus keiser Caroli quinti broder uff der h. drei koningen abendt im dhom zu Coln zum romischen koningk erwelt worden, hab ich in sampt allen churfursten [18'] ohn den hertzoch von Saxen uff dem Dhoimhoiffe in dem groisse regen sehen uff die perde stigen.

Und uber 14 tage darnach, wie er zu Aich gekronet zu Coln widder ingeritten, hab ich innen sehen und hoeren hulden. Ich stunde uff einer banck gegen dem portal uber dar uff es sass.

 

Diß jar nach parschen wart Herman und sin scholgesell Tylman Duyssel zu Emerich inß Cleivischslandt geschickt zu studern. Quam dar zu schiff den dritten godestach nach parschen. Den andern tag ginge er zu Cleiff, sach da funf man der einer ein graf war richten, wilche den Rhein strom bei Engers untfrihet hatten. Im fraterhauß zu Emerich wont er eirst, hat ein halb jar sin eigen, kost dan ander halb jar ware er der monichen kostgenger. Sin rector daselbst war dominus Petrus hompheus Cochemensis, hort aldum manutium grammaticum

 

War dißmal mit eim schaifsgrawen paltrock von vil falten bekleidt, dan der furst von Cleve kleide auch also sin hofgesinde. Uff dem heubt droich einen swartzen hoidt oder roit sclap mutzen mit ohren hangendt, weisse wullen hoesen.

 

Anno 1532 den 8. marcii ist im sin broder Gotschalck geboren, wie Herman noch zu Emerich war. Quam aber umb die zit in der fasten zu Coln.

 

Nach parschen foir er widder nach Emerich mit sinen geselln Adolpho Wipperfurdt und Johanne Euskirchen. Ascendeirt ex sexta ad septiman classem, begaf sich do in eines burgers hauß, Johan Pas genant, in die Steinstras zur herbergen, da er dan unbezwongener freier und verthoinlicher lebt, das er zu letzst armut leidt. Derhalb gegen den herbst nach Coln gangen, newe zergelt und proviande zu hoelen. Ad patriam remeare meam me cogit egestas.

 

Do nam in sin fatter mit uff die Mosel wein zu gelten, das er an im geselschaft mogt haben.

 

Nach remigii zouch er widder und zum drittenmal nach Emerich. Quam bei einem schiffknecht Johan Hoissen und Bingin ehelude gen Wilacks hof uber zu wonen. Alß do umb andreæ der Rhein vor Emerich gladt zufroir, hat er dar uber gangen mehe dan einmal binnen veir wechen.Da leidt er groisse kelte und lebte auch unordentlich.

 

Am ende diß jars und folgens etliche monat hat er das dreitagige feber gehabt.

 

Anno 1533 umb parschen verleiß in wol das feber, wart aber krewich und grindich vol leuß, hat halß gesweir und lembde, das er zu Emerich lang kranck lach. Kunth daß jar auß nit wol genesen, also das er nit vil studern kunth. Macht also daß jar auß wol halber zu schanden. [19]

 

In disser siner swacheit hat im sin fatter fast fruntliche breif uff Emerich geschriben. Und in einem breif sub dato ultima augusti hat er innen gesegnet mit gotlicher benedidung zu etlichen gnaden gode zu lobe und sinem gesclecht. Wiewol er domalß wenich wircks von sulchem schriben machte, so hat er doch sulchen breif verwart und folgens groiß dar von gehalten.

 

Am 17 octob. diß jarß ist im siner motter motter avia materna Margreth Baechmans zu Dormagen abgestorben, da sie begraben ist.

 

Anno 1534 im anfangk diß jars ist er mit vil bloitsweren gequelt gewest, da von er hinder der lincken scholtern ein linzeichen sin lebtag behalten, dan daselbst kleften im das hembt drin, das es nit heilen wolt.

 

Dissen 23 febrvarii ist im sin broder hieronimus geborn.

 

Nach halfasten diß jar ist er hin uff nach Coln gangen, sin moen und anfrewen suster zu Lanck und zu Urdingen, zu Dusseldorp, im Ham gegen Neuß, und andereßan angesprochen und kuntschaft mit in gemacht.

Aber nach parschn zum veirthen mal nach Emerich gefaren, dan daß mail waren kein vernoimbde schoellen in grammaticalibus in Coln, sin herbergh verendert bei einen snider gegen der Verportzn. Ist fort ad quartam classem ascendeirt.

Gegen den herbst leiß in sin fatter nach Coln komen, gedacht in nit lenger binnen Emerich zu laissen. Drumb ist er den 6 novembris widder hin abgefaren und hat sin kleiden und boich zu hauß gestallt.

Also hat er 3,5 jar zu Emerich studirt und doch nit seir wol in der leer zugenomen, daß er folgenß duck beclagt hat.

 

Den eirsten decemb. diß jars ist er ad bursam Laurentianam komen und von dem regenten Henrico Tongerensi theologiæ lic. angenomen. Da er angefangen in dialectica zu studern.

 

Ist im selben decembri fort tanquam beanus deponeirt.

 

Den 11 decemb. hat im sin fatter sinen introitum in bursa coronarum laissen dhoin und sin jura geben, da er im ein prebendam studiosorum von den provisoren ex fundatione q.d. Herman Dwergh hat erworben. Und ist daselbst von doctore Joanne Pauli ab horst, dem rectorn der Bursen angenomen, funf jar die frie kost da zu haben, dan es fiele dem fatter sweir genoich.

 

Anno 1535 ist er under domino Bernhardo Georgii doctore juris decano Cuniberti et rectore Universitatis immatriculeirt und ingeschriben, also memb. universitatis worden.

 

Im quatertemper in der fasten diß jarß hat er sin eirste weihung in der kirchen zu Maximinen under dem wiehebischof Quirino Kempensi bekomen.[19']

 

Zu disser zit hat er einen langen ober rock treirs gra wullen von farben wie lei oder schifferstein mit langen weiten mawen fast under die knehe so lanck alß der rock, hat ein swartze sclapmutzs oder ein mutz oben mit zwen lappen die man auch umb daß kinne kunt dhoinumb, wie der studenten brauch do war, allet mit langen kleidern zu gain.

 

Es hat sin fatter disßmal am gericht zu Dormagen mit joncker Emondt Ruischnberch und andern zu schaffen. Da hin moist Herman mit im ghain und wart also frohe angefoirt.

 

Anno 1536 den 20 maii ist er baccalaureus artium promoveirt worden, und sich darnach ad phisicam begeben, aber in dialectica nec phisica nit gar fleissich studeirt, dan er hat in grammatica nehe gut fundament gelacht, so hat er auch nehe privatum pedagogum gehat, der in trulich instituert het. Schampte sich vil zu fragen.

 

In der Mariengarthen gassen wonte ein meler, da leissen sich die studenten abcontrafeiten. Er fandt auch rhait zu gelde, leiß sich auch abmalen.

 

Anno 1537 den 15 marcii ist er post examen von doctore Hermanno Deithart hammonensi vicecancellario mit H. Arnoldo caplan s. Jacob, Joanne Cortessum offerman daselbst und vil andern in licentiatum artium promoviert.

 

Am 19 maii glich druff ist er sampt Iosopho Goltbergio et Goswino Winter Berckensi sinen lantzleuthen in magistrum in artibus von magistro Hermanno Blanckenforst monasteriensi promoveirt. Der actus war herlich, sin beide gesellen worden beide canonici Georgii et Cuniberti in Coln, etc..

Zu dissen promotionibus eilte erzu seir, war wat hoichfertich, het nutzer gemach gethain. Eben wie er in granmatica, also war erauch in dialectica oder phisica nehe recht fundeirt, het nit durfen eilen.

 

In dissem jar hat er angefangen in institutionibus justiniani et in jure zu studern. Sin fatter hat im corpus utriusque juris und bartoli opera gegolten. Hat sich auch uber ein jar in collegio studiosorum juris laissen inschriben. Und doch gemechlich angefangen drin zu studern.

 

Am 21 maij, ist im sin suster Sibilla geboren.

 

Er hat eitz musicam privatim a magistro Johanne Lippia ob dem vorstunde, daß er noch dhomher und weibischof zu Coln sult werden. Also hat Herman in figurativis und discant geleirt, daß er wol ein parthei mit kunth halten und sich uff die mensura und recht figurern und orgeln zum theil verstunde. Aber uff keinen instrumenten musicalibus moist er leren spilen alß virginalen, lauthen, harpen citharn, violen, giglen, peiffen oder derglechn, dan waß er bei sich selbst pfantiseirte, dan sin fatter wolts im nit gestatten, het lieber gesehn daß andern im, dan er andern spilten.

 

Im breth und mit wurfel und charten wist er zu spiln, hat doch kein hohe lust dar zu.

 

[20]Umb diß zit ubten sich etliche studentes im malen und schildern mit der feder, kollen, pinsel und farben, also leirt er das auch mit innen allerlei farb zubereiten und maelet vil, hat groisse genoigde in schilden und wapen, der er gar fil leirte kennen.

 

Er ginge auch einen monat bei meister Johan Ketwich, den alten deutzschen schreibmeister, leirte die handt etwas setzen.

Dan dweil er magister artium war wolt er von allem etwas wissen, und begunte eitz moit zu krigen, umbzusehen.

 

Etlich boese boben von studenten brachten in etliche mail in geselschaft lichtfertiger personen von frawen leuthen, da man aß, dranck, schertzste, lichtfertigen reden und boilschaft dreiff.

 

Anno 1538 hat er mit sinem fatter und Johanne Strubbonio zu Dormagen auß gericht, zu Knechtsteden und zu Polhem geritten. Und zu pferden und riiden groissen gefallen bekomen.

 

Wie nach Deutz der stadt Coln gelegen so war er noch nehe da gewesen. Dan diß jar eirst da er der alt pister s. Joriß angestochen und vil heusser verbrant sint ist er eirstlich da hin komen.

 

Diß jar hat er vil zancks, sclegereien und unwillen von etlichen bosen studenten in der Cronenbursen gehat, alß mit m. Thoma Romer inliacensi, Stephan vel Valentino Lubicensi, der in hinden an den kop am topf oben dem halß hat verwont. Sult der memorien ghein forthel gewest sin. Hie macht er von in diß verslin prestat utrique notho fatvus documenta magister. Deß sie sich hart, villicht mit warheit annamen.

 

Anno 1539 den 24 augusti ist er in baccalaureum juris a doctore Godefrido Groppero ordinario primo promoveirt, sin punctus war, 50 avi accusare 100 de eden. Hat disser actus 11 goltgl. ungeferlich gekost.

 

Alß her Joannes Pauli ab horst doctor in der Cronenburso gestorben den 14 septemb., ist Herman ist Herman in sin stat rector Bursæ coronarum worden, mehe auß gunst der prebendaten dan der provisorn. Dan wie war sagt her Arndt Brauwiler, er were noch zu jonck, het lieber m. Theobaldum da gehat.

 

Diß zit war sin rock swartz wullen lanck under den knehen, mit eim wullen absclach vom selben doich, mit gestuchden mauwen und hangenden klinen mauwen. Einen worsetten paltrock, ein arnersche samarij. Ein ronde bonet uff dem heubt war swartz wulln.

 

Diß jar wart im zu guttem doctor Horst missa de domina sabbatina s. Jacob bona fide von pastor und kirchmister geben dede jarß 32 goltgl.. Dar gegen lachten sich joncker Peter Furstenberch und Georgen Syndorf Nuwenarß secretarius. Also daß Herman und sin fatter zu Honf, zu Kudenkhoven, zu Ramersdorf gen Bon, zu Seirstorf im Gulcher lande vil ab und an reiden, ghain, und faren moisten. [20']

 

Anno 1540 den eirsten janvarii ist Maria Keppel sinß fatters motter die 38 jar widwe gesessen in got verstorben und licht sant Jacob begraben.

 

Als Hermans fatter innen uff jedem orde mit den zunamen Weinsberch hat laissen inschriben und nennen, noch dannest reiß der beiname Swelhem zu zeiten mit in. Damit das aber bei sinen andern brodern nit geschege, und er diß jar rheinmeister war, hat er sin veir sohne Herman, Christian, Gotschalck, Hieronimum in der weinschoelen mit dem zunamen Weinsberch vor geboren und ehelige colnische burger genent und inschriben laissen, wie daselbst zu besehn und zu bewisen, (actum prima julii anno 40, teses Lenhardt von Bracht und Peter Beickhuysen)

 

In dissem jar war ein seir hitzich somer und finge an der pestilentz seir zu sterben. Sin fatter und er gingem im ampt Lewenburch zu honf zu gericht, umb der renth zu s. Jacob, warn duck da. Im julio lagen sie zu Bon im Heisterbacher hoiffe lange zur herberge. Und waren vil truben im julio reiff, weissen und rothen.

 

Am lesten tage augusti wart im sin leste suster Sophigin, siner eltern leste kindt geborn.

 

Dissen herbst woiß zitlich vil gutz weinß der starck war. Und leirthe Herman eirst einen viß drinken, der gutte kauff die quart roitzs 6 h., 4 h., der weiß 12 heller 14 h., verursagte die geselschaft und macht vil beikompten. Er wart ein krenzgin von im, Hersbach, Goltberg, Dutz, Betztorf, Anholt, Reven, Broich und vil andern uffgericht. Dar in starck gedroncken wart, ohn sinen nutz.

 

Anno 1541 im somer ginge die sterbt heftich widder an. Er war rector burse coronarum, leiß etliche gesellen und prebendaten in ir heimat zehen, die wolten. Mit den ubrigen zouch er in die cloister zum Altenberge und Knechtsteden spaceren, lag da etliche wechen, er warf der ebt willn.

 

In disser sterbten starb im ab sin suster Agneß ingekleite suster in der Reimersgassen. Sol ir profeß im doit bedde gethain haben.

 

Am ende diß jars zouch er mit sinem fatter oft zu Sunnerstorf, da im ein groisse pleibt von wegen Agneßn Korth untstanden, deß suster gestorben war.

 

Anno 1542 diß jar haben sich vil gerichtzhendel von wegen absterbung sines ohmen Wilhm Korthn und Geirtgin eluden, Johan Koller und Geirtgin Korthn eluden, Johan Korthn, scholnßn zu Woringen. Auch tagleistungen zu Dusseldorf, zu Monhem, Dormagen, Sunnerstorf, Berchem erhaben und zu getragen. Dar zu Herman gereist solliciteirt und sin practick in jure inß werck leren stellen.

 

Ist mit siner moen Drutgin widwen Hersbachs zum Hollender und irem sohn herrn Christian Heresbach nach Wesel bei doctorem Conradum Heresbachium inß hauß gefaren. Da uff der bruloft Mariæ Hersbachs amitinæ hoichzit, die an Henrichn Bremgin, den rentmeister zu Wesel ehelich bestat wart gewest.

 

Dissen somer hat er in vacantiis wie breuchlich pro licentia in jure, titulum 100 de pig. et hipothecis gelesen in scholis legistarum, war noch jong gnogh, eilt doch zu seir.

 

Im herbst feil Renatus prinz von Vranien inß landt van Gulch mit kreichfolck, brant, raubte, etc.. [21]

 

Anno 1543 den 15 febrva. hat er 50 fi. 100 de jure emphi. repeteirt, wilch im d. Petrus Clapis sin ordinarius primus professer in legibus assigneirt hatte. D. Henricus Riswick lic. war sin opponens.

 

Dißmal hat er einen langen wullen swartzn rock mit taffetem absclach und vor uffsclegen gefodert ohn flawiln.

 

Im Gulcher kreich do keiser Carl Duren stormendt ingenomen und das landt van Gulich bekomen auch Gellerlant, und sin fatter binnen jarß borggreif worden under dem Rhaidthauß wonte, und Herman vil irthumbs mit den moitwilligen studenten in bursa coronarum hat, verleiß er die Burß. Zauch inß hauß Weinsberch, daß eitz ledich stunde, scloich da sin studorium uff und practiseirte in jure.

 

Dieweil sin fatter umb des weinzeichns willen, das er gab, nit wein zappen moist leiß er sinen son Herman sinen burgerlichen eidt uff dem Swartzen hauß dhoin und in sinen namen weinzappen in eim geheurten hauß in der burgerstrassen. Wart also eirst burger, dissen eide swore er ultima maii.

 

Diss sant johanßmiß wart er von siner gaffelgeselschaft vom Swartzenhauß zu rhade gekoren. War sin eirsther rhaidtzganck, dan dweil sin fatter im neunthen raitzgang burggreif wart und nit mehe zu rhade ginge, wolt die geselschaft den sohn haben. Und war frembt das ein student zu rhade ginge.

 

Am 5 septemb. war er under d. Clapis in privato examine, tracteirde 50 incivile, de bo. autho. judi. possi. Aber den 26 septemb. war er in publico examine im capittel hausse Andreæ in presentia 12 doctorum tracteirde 50 transigere et 2 etc. codici, de transac. etc.

 

Am 6 novemb. promoveirte doctor Lodowicus Falckenberch Conradum Betzdorpf, Johannem Anholt, und innen zu licentiaten in legibus seu jure civili.

 

Er hat do einen swartzen langen wullen rock mit dem ab und uffsclage damasken gefodert, die mawen mit flauweil verbrembt, oder besatzst, gemacht wie die vorigen. Hat einen kammelotten gewolckten paltrock. Ein ronde wullen bottet. Einen gulden krach am hempt.

 

Anno 1544 in marcio leiß er sinen bart eirst an waxssen und mit keinem schermesser scheren, wie er vor hin zu allen 4 oder 6 wechen zu thoin plach. Und wart im der bart castanien lichter brun, den er waxssen leiß und nit vil kurste.

 

Umb diß zit ist er ex commissione archiepi. Hermanni a Weida advocatus curiæ Colonien. warden, da er sin jurament presteirt hat. D. Bernhardus Geisken ab Hagen, cancellarius lex dissimi hat im die commission zu wege pracht.

 

Wie er dißmail im hauß Weinsberch sinen ganck ab und an hat, oft allein dar in war und studeirte [21'] in jure und sin alte studia repetirende, sint im allerlei ansclege vorgelauffen, wie daß haußgesclecht und nam Weinsberch in ehren mogt pliben. Und wiewol er dißmal gar nitz oder wenich gnogh vermogt, so ist er doch bedacht gewest, wie es geschein mogt oder zu funderen were.

 

Anno 1545, wie sin fatter eitz durch sinen deinst gebonden nit mehe reisen mogt, hat im sin sohn sin gerichtzsachn, dar in er gefallen binnen und baussen Coln vertrotten solliciteirt und advoceirt. Auch anderer leuth sachen verwart. Ist einß zu Dormagen durch Tilman von Langel arresteirt, und hat sunst vil widderwertigkeit, smache und haß uff den halß geladen, dan daß ein gluckte wol das ander ubel. Vernam do, daß die jura und leges nit jeder zit stat gewonnen sich das recht drehen und beugen leiß, das gewonheit, breuch, stilus, practick moist heischn und zu sithen sin. Das im wehe dede. Wart also mit passivus advocatus.

 

Diß jar wart im das scheffenampt am hohen gericht an presenteirt. Daß sin gesellen scheffen Reven, Spiegel, Saltzburch seir triben. Aber sinem fatter war nit gelegen, 250 goltgl. und ander unkosten drain zu lagen.

 

Umb disse zit hat er sich mit siner motter magt Gretgin Olups angelacht, die besclaiffen, und damit siner elter ungenadt uff sich geladen, sonderlich sin motter seir damit verzornt.

 

Als am ende deß augusti sin suster Maria an Peter van der Ordenbach bestat waß, zauch er mit dem uff die Moesel, sinem fatter wein zu gelten. Und galt alle die wein zu Brem, die da feil waren bezalt sie auch. Ordenbach galt auch, waß er bezaln kont. Do worden Herman 16 fod. weinß zu Neif half uffgedrongen van ein von Edger, die er uff borg lode zu hauß pracht, drumb sin fatter zornich wart. Warn gut wein, drumb schenckt Herman sie zu feilen kauff vor Coln. Und wie sie sin fatter versorgt, wolt er sie haben, leiß sie ufffoeren und der sie bedruncken hat, man in mit recht for in der wein schoeln, moist im etliche stuck laissn und wart also der fride gemacht.

 

Anno 1546 uff johannis wart er zum zweiten von siner gaffelgeselschaft des rhaidtz erwelt. Und auß haß und neidt von gerichtzsachen und deß weinzappens ritmeister im rhade gemacht, das vil kosten solt.

In dissem jar ginge der dutzsche kreich an, den keiser Carl gegen den von Saxen und Hessen principalich foerte.

 

Dissen herbst ist er abermal vor sinen fatter zu Lanstein und uff die mosel gezogen. Zu Alcken die frensche wein gefeurt und zu Coln verschaft.

 

Am 6 novemb. ist im sin dochter ein naturlich kindt von Gretgin Olys geboren, daß er swerlich erzehen moiste.

 

Anno 1547 uff colner gotzdragt hat er sinen ridt gethain alß ritmeister zu Coln, Wynandt Moir war sin gesel. Herman hat uff siner sithn 60 perde. [22]

 

Er begerte dißmal im rhade der lection in institutionibus so vaceirte, aber licentiatus Anholt, her Arnt von Siegen deß burgermeisters eidomb, hat mehe gunst, der sie erlangte. Und da er diß lection het bekomen mogen, were ein groisse ursach gewesen sin studium zu continuern.

Glichfalß vaceirte daß officialat zu Coblenß, darnach er stunde. Daß bequam einer viß dem camergericht war gevbt. Sin fatter solliciteirt auch vor in umb h. Buscho canonicat zu s. Gereon, war prebenda Universitatis. Die begerte her Arnt van Bruwiler vor sinen son und erlangte sie. Also das Herman das gluck nit lauffen wult, die gunst und frunde irreten.

 

Wie er diß jar mit sinem broder Christian vur sinen fatter wein uff der Moselen sult gelten und es noch zu frohe in der laesen und wirtzen war, ginge er mitler weil fort hohen und quam uff s. severinß tag zu Treir. Besach die stat, van dan foir er zu Brem und galt da die wein, bestalt sie hin ab.

 

Anno 1548 den 15 janvarii hat er sin eirste ehefrau Weisgin Ripgin widwe Pauli van Cuba, burgers in Coln, einß burgermeisters dochter und enckeln zu Neus getrewet. War ein feine, guttige, vermogende frawe, die zwei sohn, Herman und Johan noch kinder bei leben hat. Nam disse in der nachparschaft einß gutten namens und wandels. Dan hohere conditiones wulten im nit glucken, sin altern hatten noch fil kinder, kunten am meisten nit dar bei dhoin.

 

Sin eltern leissen im einen langen swartzen wullen rock mit marteren gefodert, mit eim absclach uff dem rucken wie ein side specks gemacht machen. Die ander kleider hat er noch von alters einen damasken paltrock, do er ritmeister waß. Sunst uberquam er ghein besonder heilichs gut.

 

Alß balde darnach zauch er uff die Mosel, galt zu Prutginvon her Jacob Morer, pastorn zu Prutgin, galt von dem zehen foder weinß, bracht die zu Coln vor sich selbst.

 

Zu parschen zauch er hin uff mit siner hausfrawen nach Cube und Bacharach zu den frunden. Sie hilt den mart mit iren schartzn und zeichen, da sie mit handelte.

Auch zu mei derglichen zu den frunden und uff den mart.

 

Umb pingsten hat er daß hauß zum Thorn auff dem Buchel von Vit Odendal gegolten, ingenomen und durch gebrochen, das er dar viß siner hausfrauwen wonong zu Weinsberch hinden inß hauß kunte komen. War seir wol gelegen.

 

Do hat er im hauß Weinsberch vor sich wein gezapt, dan sin eltern vergunten es im, wonten under dem Rhaidthauß, da practiseirte er auch und deinte den leuthen in iren sachen. Er leiß sin hausfrawe mit irem handel noch alß gewerden half darzu. Es waß wol vor einen licentiaten etwaß verachtlich. Deß moist er sich getroisten, sin rent war nit groiß, wiewol sin hausfrau korn und gelt rente zu Neuß von [22'] irem patrimonio hatte. Auch die freihe wonongh und zwei zinshuser hatte. Einß dreif daß ander nit auß.

 

Ist auch zum achter deß kirspels s. Jacob diß jar erwelt.

 

Dissen somer hat er daß hauß Cronenberch an der Hoeportzen gegolten und den 17 augusti im schrin Petri sich mit siner hausfrawen dran schriben laissenn. Auch ein duir drin gebrochen und auß Weinsbergh dar in gangen, den keller geestricht. Moen Barbar von Gladbach, ein alte frawe, der er zugehoirt, mit der kost versorgt. Daher er mit den frunden vil irthumbs bekomen und abgunner dar zu.

 

Sin hausfrawe Weisgin hat ein hauß uff der Bach zur Kymnade zum theil genant durch scholt an sich gegolten, dar an macht sie in mit dheilhaftich und im schrin verwaren.

Alsulche sachen haben sich durch diß jar also zugetragen, aber noch nit alle verricht, gestillt und bezahlt.

 

Anno 1549. Er hat ein ganck auß dem hauß zu Cronenberch uber den hof zu Weinsberch mit kisselsteinen gesteinwegt und fort uff dem hindern hof biß an daß hauß zum Thorn und fort uff dem dritten hofgin hinder Pauli van Caubs hauß. Also das man unden harden tritt hat von einem zum andern hauß.

Er gebrauchte sie diß jar alle veir. In Pauli hauß machte sin hausfrau schartzn, im Thorn scleif er, zu Weinsberch zapte er wein, zu Cronenberch hilt er dischs.

 

Diß sant johanßmiß wart er zum dritten in rhat gekorn.

 

Am 15 octob. ist im sin fatter Christian von Weinsberch am quartanen feber under dem Rhaithauß in gott verstorben, do er 7 jar borggreff, 18jar kirchmeister, und 8 jar bannerher gewesen.

Licht zu den Carmeliten in s. Josephs capeln begraben. Und hat Herman uberauß lebe gehat.

 

Am 22 novemb. ist er in stat sineß fatters zum kirchmeister sant Jacob in Coln erwelt worden.

 

Am 27 novemb. ist er in stat sineß fatters, ohn das er drumb geworben, zum burggreven under dem Rhaidthauß erwelt. In dochte, es wurde im der deinst ein verkleinerong sin. Aber her Arnt von Bruwiler, der es im eirst anlangte, rhete im, er sult es annemen. Kunth es jeder zit wan erß besser vermogt verlaissen.

 

Anno 1550 den 19 febrvarii uff eschtag hat er eirst under dem Raithauß kost gehalten, dan biß herzu, waß sin motter so lang da pliben, die sich eitz in ir gehuirt hauß in die Burgerstraß verfoigte, wolt da weinzappen, daß ire nuhe ohn alle widderrede frei ware zugelassen.

 

In sinodo hat er ertzbischof Adolf von Coln den wein presenteirt wie im amptz halber zustunde [23] fursten und herrn den wein zu presenteren.

 

Alß er am 26 marcii sinen borggreven eidt im rhade gethain, wart im das weinzappen verpotten umb des weinzeichens willen, das der borggreif mit gaff, doch galt er darnach wol etliche wein, lagte die zu cronenberg und verkauffte sie mit ganssen stucken inß groß.

 

Am 10. junii keiser Karl, und koninck Philippum von Hispanien in Coln gesehen, da dissen tag zwein uff dem Heumart gehangen warden. Und er moist von wegen einß rhaitz zu den frembden herrn gain, die latin retten und verdeutzschen, daß ein rhaitz verordneten so kein latin wisten.

 

Den 2 julii visitationis mariæ ginck er zu Weinsberch, satzst sich da uff einen raststoil in der camern neder, dar uff er insclaiffen wart. Und sache im draume daß hauß so licht, daß nitzs lichters kunth sin. Und damit ein schoine jonfrau mit irem kindtlin uff dem arm, und ville so da von frunden, bekanten und unbekanten waren fielen neder uff ire knehe. Und daß kindtgin reckte sin rechte handt uff, scloich ein crutz uber sie alle und benedide sie. Die jonfrawe aber sprach, latinisch, et misericordia eius a progeniæ in progeniem timeatibus eam. Dar uber Herman von schreck und wonder erwachte. Ginge darnach zu Carmeliten in die vesper. Dar etwaß besonders mit disen verß under dem magnificat widderfoir viß befelch einer jonfrawen wie der organist anzeigte. Ob diß nuhe ein gewisse vision oder glicher drom an beiden orthen gewesen ist gode kundich. Er hiltzs vor keinen droum.

 

Den 27 novemb. hat er ein alte klein behaussong an der Hoeportzen neigst Cronenberch gegolten, derhalb allein, das es an dem orde wol gelegen, ob man es zum hauß gebruchen moist oder wulte. Ist im schrin zu Arsberch mit siner hausfrawen Weisgin dran geschriben.

 

Hat darnach auch 7,5 rad. mr. fharn von Vuylappel, und drei daller fharn von der Kymnaden foldenden jarß abgelacht.

 

Anno 1551, alß er und sin hausfrawe Weisgin vernamen, das deß borggreven deinst gemechlich waß und auch zimlich jarß inpracht, sie auch ein boiß bein hat nit so gerade war, verleiß sie den handel der schartzn, macht alles zu gelde und verheurten ir hauß uff der Bach, dar sie biß her zu schartzn gemacht hat, dan daß gesinde war mit getrewe, verwarloisde daß feur, so daß sie sich schadens besorgte.

 

Er und die ander kirchmeister und achten sant Jacob hatten groissen irthumb mit dem capittel s. Jorien halben deß gebewß. Derhalb richt er under in zwelffen allein ein krentzgin und beikompst zu virthel jar an, sich in der kirchen und armen sachen zu beratsclagen. Glichfalß ruste er ein sprechauß uff sinen budel an, neben dem thorn, damit sie ein abgesondert ort irer samenkompst mogten haben, dan ohn rhat were nit vil außzurichten. Und da durch hat die kirch und armen folgens wol prospereirt. Daß krentzgin ist 5 julii uffgericht. Daß sprechauß 27. novemb. gebaut.

 

Anno 1552 den 18 febrvarii hat er das isern gerimpst von 2000 lb. mitten durch die kirch sant Jacob laissen setzn, das er als executor auß dem testament Barbarn von Gladbach da hin procureirt hatte. Da her ein gerichtlicher proceß im sal mit dem capittel erwoiß. Und doch durch einen geswongen vertrag dasselbich jar gestilt. [23']

 

Dissen glens und somer war er swach und alß gichticheitt, derhalb er bloit leiß und purgeirte.

 

Im sommer diß jars hat er sinen jongern broder durch hilf siner hausfrawen an ire nichte Catharin Wolf irer suster Agnesn dochter bestat. Want vor ir fatter Gerhart Wolf were alt und ein widweman, moist hilf haben das vehe zu schriben, die leuth zu manen und Gotschalck were dar zu tuglich, sin alter broder Christian waß zu wilde, ginge der geselschaft zu vil nach. Also dreif Herman uff dissen heilich, dan dweil er kein kinder zilte, hoft er sin broder Gotschalck solt daß nuhe dhoin, damit der nam und stam nit verginge. Und geschach daß doch mit Gotschalk nit.

 

Anno 1553 den 4 marcii ist im sin broder Hieronimus zu Hamborch abgestorben, der er sich seir betrobet. Licht daselbst under einer gronerlinden vor sant Peter begraben.

 

Er hat diß jar veir silbern schaelen laissen machen. Sin hausfrawe hat wol etwas silberwircks, doch wenich.

 

In marcio diß jars starb im ab sin swager Gerhardt Wolf am haif veschriber, und sin swager Gerhardt Ripgin der lame zu Neuß im lewen. Disser macht sin testament, dar in er siner sustern min hausfrawen funf morgen landtz bei Neuß besatzst, dar von er jarlichs 5 malter gersten pachtz bequam.

 

Diß jar hat er einen goltgl. erblich helfen belagen zu behoif der memorien Barbarn von Gladbach vur 2 jarn verstorben im hauß Cronenberch und sant Peter jarlichs zu halten.

 

Alß diß jar ein zimliche sterbt in Coln von den krancken von Metz komenware, starb Herman van Cuba, sin steifson, item Catharina, sinß broders frawe im eirsten jare, ist er und sin hausfrawe und motter und brodere zu Dormagen in den Swanen geflawen, uff irem haif ein gemach gebawet. Ist auch ab und an zu Neuß bei den frunden gewesen, dar auch siner husfrawen broder Ewalt Ripgin burgermeister dißmail starf, bleib zwein manat von 27 julii auß Coln.

 

Nach siner widderkompst erwarb er ein grab under dem klockenthorn sant Jacob. Dar von breif und siegel erlangt.

 

Dissen herbst galt er 17 stuckweinß zu Coln am Kranen, lacht die zu Cronenberch. Wilch hauß er selbst inhilt und mit ingedoim bedden und hauß raidt moissich leiß stain, dan er gedacht nit under dem Rhaithauß am deinst zu sterben.

 

Anno 1554 den eirsten janva. hat er und sin hausfrau regnong gehalten, viß eim register dar in er durch daß vorich jar uffgeschriben hat, waß tag vor tag bei einem heller außgeben war, und ertroge sich zu einer mircklichn summen inhalt des registers. Von anfanck irer beider ehestandtz haben sie prima janvarii ubersclagen, ob sie zu foren ader zu ruck gangen weren. Sie sagt, ir swager Engel Ernst het nehe jars rechnen willen, derhalb verdorben, ir vorman hetzs auch nit willen dhoin, begertzs von eizigem Herman, der hatzs seir gern gethain. Und war zu vil sachn nutz.

 

Am 19 febrvarii fheil Herman singultus ein ungewonthlicher sclick, vor der ohn uffhoren mehe dan ein ganse stunde davurten. Waß er dranck oder dede half nit, sclickten alleß seir held und uber lauthart. Doch uffs leste verginge er von im selbst. Wuste die ursach nit. Hat nit gar vil gedruncken. [24]

 

Am lesten octobris hat er mit Weisgin, siner hausfrawen, irer beider gemein testament uffgericht. Dan eitz war ir sohn Herman dhoit, daß sie etwaß dhoin kunth und doch eitz nit gern dran war. Vorhin dreif sie selbst druff, dismail moist Herman drumb anhalten. Und moist doch allet da hin dencken er were nach oder vor ir gestorben, daß er zu einer handt etwaß dhoin mogt, daß dem hauß Weinsberch nutz were. Dan daß sult sin dochter sin, einer sinß gesclechtzs der sohn, dweil er gein kinder hat. Und wan es nit viß leibde zum hauß und gesclecht angesclagen were, het erß vor sin eigen leib wol mehe kunnen geneissen.

 

Den 26 novemb. hat sin broder Gotschalck sin hausfrawe Elisabeth Horns ein jonge person getruwet. Wilchen heilich er auch hat helfen inwilligen und machen verhoffent alles er sult kinder zillen, daß doch nit gluckt ist.

 

Den 14 decemb. hat erden Weingart und 5 huser in der Achterstraissen, gnant foelix, von sinem neiffen herrn Carolo Kuckelman von Aich premonstratenser ordens zu Knechtsteden und sinen sustern und broder gegolten, und ist mit Wesgin, siner hausfrawen, im schrin Severine dran geschriben.

 

Anno 1559 den 28 janvarii hat sich sin hausfrau Weisgin zu Arsberch am schrein an halfschit von drien heussern uff der bach laissen weldigen von dhode irß sohns Herman und iren haußwirt daran dheilhaftich gemacht.

 

Am 9 marcii hat er etliche appelbeum in den hof in die Achterstraiß gesatzst, die gerathen sein. Auch die britzn versatzst einen grashof zugerust, die heusser uffs neut vermedet und sin lust mit possen krut blomen da ghat.

 

In septemb. diß jarß hat er ein gedenckboich siner jaren zugericht, allerlei geschichten, contracten und nodigs darin zuschriben, hat vor eirst ungeferlich drin geschriben von dem andern Vuylappels hauß zur bach wartz bei Cronenberch wie er daß vonden Carmliten gegolten.

 

Am 9 octob. hat er Goddert Peschs 20 gl. geben zu folles der mauren uffzu foeren tuschn neigstem Vuylappelß hauß und sinen Peschn hauß, deß sult er die geregtigkeit haben balcken drin zu lagen, da es nodich.

 

Umb den 30 novembris hat er vil sweren am leib gehat.

 

Anno 1556 den 16 marcii hat er mit siner hausfrawen Weisgin 32 daller jahrlicher rentenvon jonfer Annen von der Reck und irem sohn joncker Diederich von Hall, amptman zu Monhem uff iren hof zu Vreistorf boven Bon gegolten. Inhalt breif und siegel und waß von der abloesen 20 rad.d van der stat Nuyß hekomende etlich gelt wie auch sinß geltz dar zu komen, die heubtsumma war 700 daller.

 

Umb den 8 junii hat erdem vordersten zinßhauß in der Achterstrassen oben ein kamer genomen und da von ein somerhauß gemacht und unden ein keltergin gesatzst zu siner lust im somer und noitturft im herbst.

 

Den 16 junii hat er zwa silbergebuilde schalen gegolten, den 22 augusti noch 2 kliner silber schalen. [24']

 

Am 26 octob. dem neu erwelten zu ertzbischoffen zu Coln Anthonio graf van Schawenberch von einß rhaitz wegen den wein presenteirt. Da vor, 14 augusti, Maximilianum koninck zu Behem, kunftigen keiser, und Marie, sin hausfraw, keiser Carls dochter, hie in Coln gesehen. Etlichn fursten den wein presentirt.

 

Anno 1557 15 april und da vor hat er ein eltertaffel sant Jacob under den klockenthorn durch m. Barthel Brun vor s. Albain laissen malen, sin hausfrau und sich druff laissen contrafiten. Auch in die personasien den pastor Newenar und Krudener kirchmeistere, sin broder Christian und Gotschalck, sinen steiffson Johan van Cuba, sin sweren Feigin Ripgin, und 1000 Johan Cortessum offerman laissen contrafeiten. Ist noch nit uffgesatzst.

 

Am 28 maii ist sin liebe hausfrau Weisgin Ripgin in got verstorben, und hat sie zu s. Jacob in den klockenthorn vor den altar begraben laissen wie sie begert hat und einen neuwen drachenfelder stein uff das grab gelacht. Sie war im vil zu frohe abgestorben, war bei 44 jar alt.

 

Den 20 novemb. hat er sin besonder testament zu einer handt uffgericht, dar in daß hauß Weinsberch durch sinen erben den hausfatter und sin verlaissenschaft fundeirt, wie er daß vor 10 oder 12 jaren im sinne gehat und etlich mail in leben siner hausfrawen concipieirt und nehe besser inß wirck kunnen stellen, dan eitz im widwen stait.

 

Diß jar im glenß, dweil sin hausfrau noch kranck war, galt daß korn 8 gl., und quam sulche deurde, daß nemans korn viß Coln moist fhoren, er Herman moist zeichen und urlof dar von geben.

Dißmal wart die ufffornde zinß bei sinen deinst zit von 2 rad. mr. uff 3 rad. mr. verhoigt.

 

Auch hat er daß Swartzhauß sin gaffel reformeirt, den verbontbreif transfix breif siegel viß frembden henden bracht haußraidt widder dar practiseirt, neu ordnung uffgericht gaffel zu halten, daß an 40 jarn nit geschein war. Summa alles widder uff einen gutten standt bracht, wiewol er umb diß zit nit zu rhade gekorn wart, doch umb siner vorelter willen und siner broder die anquamen.

 

Anno 1558 den 5 febrvarii hat er sin ander hausfrau bekomen, Drutgin Barß, elige dochter Anthonii Barß von Durenn, widwen Wilhelm Rossn, die hat wol 8 lebentiger kinder aber war fast reich von gutten renthen und gutteren binnen und buissen Coln. Auch von guldn und silber geschir von gelde und hat wol 100 stuck weinß in Coln und zu Dort ligen. War sin nachparin gegen dem Rhaidthauß uber wie auch die eirste sin nachparin war. Hat aber ander sinne und weise dan die forige.

In dissem jar starb keiser Carl, wart sin broder Ferdinandus in sin stat erwelt. Auch starb ertzbischof Anthoin, und ertzbischof Hanß gebbart von Mansfelt in sin stat erwelt 26 julij, dem ich den wein presenteirt.

 

Er hat zwei gulden kopger vur 40 dall. gegolten.

 

Diß jars und etwas zu vor hat er deß brilß eirst gebraucht. Dar zu in die noit zwangh sunst het erß noch nit gethain, sunst kont er bei der kertzn nit lesen. [25]

 

Disser zit hat er die vesper alle sontage auch hillige tage durch das jar helfen fundern, auch die renth zum theil dar zu zu erlangen, inhalt der fundation, aber m. Johan Cortessum ist der meiste ursacher, war offerman.

 

Anno 1559 prima janvarii hat er siner zweiter hausfrawen zu gefallen ein teglich register aller haußhaltung uffzurichten eitz viß noit daß vorhin viß friem willen beschach, dan sie sagt er kratzte hinder sich, damit er auß dem verdacht queme.

 

Den 2 marcii reidt er mit Augustino notario zu Aich von wegen der Rossen erben einen außganck einß hauß zum Wildenman uff dem mart standezu thoin, wie geschach, und ginge da zu Aich in die warme bader. und zu Borschit.

 

Am 15 aprilis hat er im guldin Horn siner hausfrawen wein uffgestechen und gezapt aber gein gelt gelaust, er war eitz nit meister wie zu vor, sie hat iren eidom Volckquin und ander leuth waren ire rhete.

Darnach den 26 octob. nochmals, da wart fast gelt geloist, sie wart krank, lagh in irem hauß, ir kinder warten der kisten und worden alle die pende gestoln. Daß ander gelt war den abendt zu hauß getragen.

 

Den 29 maii trewet sin broder Christian Catharin von Hemmersbach, ein widwe zum Lempgin uff der Hanestrassn. Hat doch ghein kinder, auch nit vil gutzs, war ein seir einfeltige frawe.

 

Dissen sommer zouch er mit siner hausfrawen mit Jurgen Volckquin und Drutgin, sinem eidomb und dochter nach Dorth, ire wein zu besigtigen. Diß vffart war den 15. julij, besahen alle stet tuschen wegen. Van Dort foren sie zu schiff biß zum alden Buschs, von dannen biß zu Antwerp zu wagen. Nach etlichen tage zu Aich und Borschit inß bat van dannen uff Gulch, und zu hauß.

 

Den 4 novemb. 8 dall. vor die gemailde taiffel bezalt, dieer in den umbganck zu Carmeliten geben. Dar uff er sich und sin hausfrawe contrafiten laissen, dan er hat lang zit vil kuntschaft da im cloister gehat, sin fatter lach da begraben.

 

Anno 1560 den 16 janvarii ist er mit sinem broder Gotschalck zu Gulich geritten. Die alte appellation sach gegen Evert Koesen zu dirigern. Ist uff deß fursten scloß gewest, daß vor zehen jaren eirst angefangen war zu bauwen. Auch uff der Merssen gewest, da der Roßn siner steifkinder hof lach.

Den 16 aprilis mit siner hausfrawen, Volckquin und siner frawen auff die inkleidong zum altenberrg gezogen, sineß broders Henrich Volckquinß, dem Herman dar geholfen hat viß alter kontschaft, so er in dem cloister mit dem abt und andern monchen gehatt.

Den lesten julii ist er mit siner hausfrawen zu Lainstein, zu Andernach, zum Laich jns cloister gezogen, spacern. Dan sie reisden gern zu den frunden, da wonten ire nichten barssen.

 

Diß jar den 17 marii ist Herman van Weinsberch sinß broder Christians eirster sohn geborn, den er uff der tauff gehaben, und nach im Herman genant ist. Deß ist er seir frohe war. Got verlehe sinem patten gnade und gluck. Aber disser broder Gotschalck ist anno 1561 den 19 augusti geborn. [25']

 

Anno 1561 den 13 febrvarii hat er daß urwirck sant Jacob eirst laissen uffsetzen. Auch procureirt, daß ohn der kirchn schaden bezahlt ist. Und steht da an der Hercrutz straissen vor inwendigen und außwendigen im gesicht, dem hauß Weinsberch wol bequeim.

 

Den 18 marcii hat er und sin hausfrau zu beiden sithen von iren verkaufften wein 500 daller beibracht und dar vor 25 dall. jarlicher renthen am churfursten zu Coln Hanßn gebhardts uff den zol Andernach gegolten, termino annuntiationis mariæ. Die breif halten uff sie beide.

 

Noch haben sie beide vor 100 goltgl. zu Zulch an Jurgenn Koch gegolten 5 mald. kornß renthn, termino prima maii.

 

Im somer 16 junii ist er mit siner hausfrawen, iren kindern und sinen brodern nach Waldorf uff iren hof zum halben theil, fort zu Swartzm gezagen. Darnach den 16 augusti zu duren bei Volckquins moem Margret Altenaiß dochter. Und zu Steinfelt in der Eiffel in daß cloister zu sinem broder her Johan. An jedem orde waren sie spaceren, hat auch in iren sachen zu thoin, die nodich waren vißzurichten.

 

Am 30 octob. ist Johan Cubæ, sin vor steifson, ein jongk gesel gestorben und sin testament uffgericht. Derhalb er mit Henrich Hoen und Jacob Voiß und iren hausfrawen Geirtgin und Agnesen Wolfs in einen groissen gerichtzhandel folgens gerathen. Ohn ander mehe irthumbs mit den frunden zu Bacharach et Coblenß.

 

Den 21 decemb. hat er vur sin hausfrau und steiffkinder van Rossen 20 goltgl. renth vur 400 goltgl. zu Uda an j. Henrich Ducker termino domini sanctorum gegolten.

 

Anno 1562 den 5 janvarii ist er amptman zu Arsberch worden. Kost in bei den schrinmeistern daselbst 12 daller.

 

Am 16 janvarii sin die volmechtigen der kirchmeister und provisorn s. Jacob mit Herman nach Mugenhaussen bei joncker Wilhem Goltstein gefharen und im da den vißganck deß Wolfengutzs zu Swartzem gethain, damit er auch folgens vom joncker belenet ist, und helt der breif uff innen und sin hausfrau Drutgin Barß. Doctor Glaser hatir eidomb hat diß gut eirst gegolten, aber do sin hausfrau starb, kunt erß nit beschutte. Diß Wolfgut hab sie bezalt mit dem vorg. breiff, der 25 daller renth am zol Andernach und noch mehe verzigs und unkosten.

 

Am 13 febrvarii hat er ein codicil uffgericht, darin sin und siner vorfrauwen gemein testament erkloret und inß schrin gelacht.

 

Den 9 marcii ist Herman und Drutgin elude an 4 gl. jeden zu 26 rad. alb. van Kuckelman zu Arsberch und an 2 gl. cur. von Engel farn columbe geschriben. [26]

 

Am 8 junii hat er sich mit sines vorsteifsonß erben und frunden Wolf von Husen, Clas Stumel, iren hausfrauwen Cattern und Agnesn zu Bacharach, Goddert und Kettern zu Coblens, fort mit Feigin Ripgin zu Coln und Henrichn Hoen, Johanß van Cube executorn, der gereider gutter, scholt, pensionen unkosten vertragen und die kleider siner motter Weisgin getheilt.

 

Am 19. novemb. ertzbischofn zu Coln Frederico den tag erwelt, einer von Widt, ein dicker man, den wein presentert.

 

Anno 1563 den 25 ja. im fastabent uff dem konincks essen under dem Raitshauß hat er von alle andern im hauß und nachparen ein gespenst in der lucht eben wie einen grossen brant mit flammen hinder dem Dhoim und Eigelsteinß portzen gesehen. Wult uff die brantklock laissn sclain, doch zweiffelt man etwaß daran, verruckt daß gesicht inß Bergsche land. Glich den achten tag uff dieselb stundt abendt darnach sach man das rechte feur. Den morgen hort man, Woringen were abgebrant. Und Lennep verbrant das mal auch. Da verbrant siner nichten Neisgin Korthn daß schoin hauß mit allem ingedom.

 

Diß jar den 5 marcij, als er sin swegerin Gertgin witib Henrich Ripgens pachtersche zu den sal zu Coln citeirt und sin anpart pachtz vom Lantzelroder haiffe forderte, ist der proces vor dem h. official eirst gegen die pachtersche von Neuß, darnach gegen Henrich Hoen und Gertgin Wolfs, Iacob Voiß und Agnes Wolfs elude interuenienten mit im angegangen. Es haben auch die frunde von Bacharach und Coblenß im cession mit vorbehalt gethain, inhalt der breif und siegel, wie auch Feigin Ripgins irß anpartzs am haif Lantzelrode bei Neuß gelegen, inhalt einß instrumenti.

 

Im schrin zu Arsberch bin ich an 5 husergin in der Klappegassn geschriben den 22 maij. Darnach 13 julii nach Dusseldorf mit siner hausfrawen gefharen, da den außganck einß klinen hauß in der Kremerstraten gethain, diß hauß war Herman van siner moder komen, hat vil drumb vißgelacht, und war ein butang permutatio domorum hinc inde.

 

Den 6. septemb. zouch er mit siner hausfrawen nach Duren, dar sie an der stadt auß dem mangelt jars 50 rinsche gl. renth, und ander fhar uff heusser hatte, zu rechnen.

 

Am 25 novemb. diß jars hat er sin besonder testament zu einer handt von der fundation deß hausfatters und hauß zu Weinsberch principalich vermeldende durch auß declarando absolueirt, und ist ein boich worden uber 200 und fast mehe folia dick. Daß er glich sinem testament festlich wil gehalten haben.

 

Anno 1564 den 24 ja. ist sin steifdochter Aletgin Ros an Laurens von Blaitzhem bestat worden. Und er und sin hausfrau haben ir 600 richtzdaller heilichsgeltz bar mit geben.

 

Er hat den 2 maii sine und siner hausfrawen Weisgins memoriam sant Jacob uffgericht.

 

Den 24 maii ist im sin steifdochter Catharin Roß ohn testament und leibserben, ein jonge magt in sinem Wyngarten in der Achterstrassen verstorben. Die motter, sin hausfrawe, hat den sterbfal irß kindtz folgens wol angenomen deß er mit genossen sult haben, inhalt der hilichs vorwarten. Aber sie durft umb irer ander kinder willen sich nit zu seir laissen mircken, den sie gar zu gethain war. [26']

 

Dissen somer erhoif sich ein groisse sterbte an der pest, sin hausfrawe Drutgin Barß mit iren beiden eidomen und allen iren kindern flauwen zu Waldorf uff irem hof den 14 augusti, bliben da den augustum, septemb., octobrem auß ligen. Herman moist sinen deinst under dem Rhaithauß mit verwarn, zauch an und ab, war doch im hertzen mit sinem broder Gotschalck und Lesbeth eluthen da. Und hilten samen gmeine kost, fingen foegel, wanderten van ein ort zum andern, spilten, hatten ir zit verdreiff.

 

Mitler weil, den 2. septemb. starb sin broder Christian an der pest im Bickelstein vur den Carmeliten. Wart sant Jacob begraben, den er und sin broder in siner krenckden ansprachn und widder zu Waldorp gingen. Sin swager Johan Horn und vil ander frunde storben auch umb die zit. Man sagt van zwenzichtausent menschen in Coln, die gestorben weren.

 

Den 9 novemb. war im der lincke arm ganß lam, alß were er gichtich gewest, ob es ein floß war, verginge dar nach in etligen tagen.

 

Anno 1565 umb den 8 marcii daß hauß Cronenberch an der Hoeportzn gebaut mit etlichen stinen durren, eim herde, stoffen oben, mit hubschen glasfinstern. Dan sin hausfrawe und er waren untsclossen darin sampt im Roich irem hauß am Maltzbuchel an beiden orten zu bewonen.

 

Wie es diß jar noch nit uffhort zu sterben und er und sin broder daß lustgemach zu Waldorf und zu Bornhem gesehen, auch zu Dormagen elmen gepost und possen ferner wolten, haben sie und ire suster auch ein hubsch klein gemach zu Dormagen angefangen zu bawen, bedt, hausrat dar bestalt einen gutten leger zu haben, zur noit, lust oder was man da schaffen wult.

 

Am 6 maii ist hertzoch Wilhelm von Gulch Clef und Bergheim etc. mit sinem neiffen, dem hertzogen von N., uff der rhaitzkamern gewest, da er iren f. g. den wein uff einer bancketn presentirt.

 

Im selben jar den 11 maii hat er eim ersamen rhaidt sineß deinst deß borggreffen und zeichenschribers under dem Rhaidthauß durch ein supplication underdienich abgedanckt. Er ducht, es were siner vocation und standt verachtlich. So gab sin hausfrawe auch nit vil drumb, die jarlichs noch 40 dall. renthen hat. Und ein rhaidt erleubt es im.

 

Zogen darnach alle gemach von dannen. Er sin ingedom und haußraidt zu Cronenberch, sin hausfrawe daß ire in den Roich. Wonte nuhe hie dan da, doch zu lest blei sie lieber im Roich. Und quam do Bela, Bela Rougeß, dan der inkompst wart weniger, und der laist van den kindern groisser. Doch hatten sie rewiger und reitlicher auch frier zu leben. Got half alß.

 

Am 19 junii vor joannis uff dem churtagh, wie sin geselschaft vernomen, daß er deß abgedanckten deinst deß burggreffen amptz erlasen waß und dem Swartzen hauß getrulich vorgestanden hat, ist er zum bannerhern erwelt.

 

Uff s. thomaß tag den 21 decemb. ist er uff dem Swartzemhauß zum veirthen raitzganck erwelt, und uff christabent im rhade urthelßmeister und commissarius worden. [27]

 

Anno 1566 den 28 febrvarii von wegen siner haußfrauwen alter pensionen ist er zu Wandloe inß Gulcher landt gezagen, durch Caster dar, und durch Grevenbroich widder nach hauß.

 

Dissen somer den 17 julii ist er mit siner hausfrauwen und kindern nach Neuß und Dusseldorf gezogen, da er zu schaffen hatt. Und zu Dormagen uff dem newen gemach etliche tag sich verlusteirt.

 

Anno 1567 den 7 febrvarii hat er allereirst sin har kurths uber den kamp laissen sneiden, vor hin leiße erß langs die ohren wassen mistunde etwaß, dan daß har waß sclecht und dunne, vor scheir kal uff dem vorheupt.

 

Umb den 14 febrvarii ist er in der borst besweirt gewest, bloit gespouwen, in der rechter siden stich, heupt pein und hitzde gehat und etlige tage kranck gewest, purgirt und medicin gebrucht.

 

Im selben jar den 25 aprilis hat er sin naturliche dochter im conuent Marien betlehem in der Reimersgassen ingekleidt, darin er sie vorhin umb allerlei ursachen ingedain hat.

 

Am 27 maii ist im sin jongste suster Feigin professa im selben cloister und conuent abgestorben.

 

Anno 1568 den 9 febrvarii ist er widder etwaß kranck gewest wie im vorigen jare. Ob er fillicht von kelten im widderfaren, die er zum Roich mehe leidt und nit gewont was dan under dem Rhaithauß, da uberfluß am feur was, weiß er nit.

 

Am 17 maii zouch sin hausfrawe zu Boichem uff ires eidoms doctor Glasers churs. colnischn rhaidtze lusthauß dar moist ich mit zu ir komen. Sie reisde seir gern spacern, aber dreif nit so gern narong und nutzs an wie sin vorfrawe, sunst hat er gutte tage bei disser, die gutte inkompste hat, er auch etwaß beipracht.

 

Im decemb. den 8 tag haben innen Henrich Hoen und Jacob Voiß sampt iren hausfrawen vor den burgermister geladen, von wegen deß geldes von den ablosen zu Neuß, wie daselbst im gerichtzs boich zu finden.

 

Diß christmissen ist er vom Swartzen hauß zum funften mail zu rhade gekorn und urthelßmeister zum zweiten worden.

 

Anno 1569 den 18 maii ist er hin ab uff Nymmagen von Theil zu wagen uff Utert und fort zur Gawe in Hollandt gereihen. Da einen sterbfhal zu wege gebracht sineß broder Gotschalcks hausfrawen zukomende, und alle sache scheir richtich gemacht. Auch daß mail Rotterdam, Leiden, Delfft besehen, an der seekanten zu Schevelinck gewest, in Den hagen, zu Leiden, zur Gawe, van dan uff Utert, Arnhem, Emerich, Santen, Berck, Nuyß widder zu hauß.

 

Den 11 junii hat er gegen Geirtgin Ripgen, Henrich Hoen und Jacob Voiß sampt ire hausfrawen Wolfs dochter ein urthel im salgericht die possession und sequestration der pachten von korn deß Lantzelroder hofs erhalten.

 

Umb den 7 julii ist er widder gichtich oder lam am rechten arme gewest, verginge balde. [27']

 

Den 22 augusti ist er hin uber Rhein zu doctor Wissel uff sinen hof zur Limbech gezagen zu Bensberch gewesen, und ist nehe weithers zu lande hin in in dem Bergschen lande gewesen. Dan sunst wol zu Siburch, Monhem und Dusseldorf.

 

Am 20 septemb. ist er mit siner suster sohnen, her Christian Ordenbach, canonico ad gradus, und Tilmanno, sinem broder hin ab nach Utricht gefaren, dar sie schaffens hatten. Von dan uff Amsterdam, van dan uber die sairsee biß zu Harderwick, van dan zu wagen biß zu Denenter und Zutphen und also fort zu hauß.

 

Er ist dissen christabendt, wie er des rhaidtzs abgangen, amptman und richter uff dem Rhaithuyß worden.

 

Uff christach ist er widder in der borst mit hoisten und stich in den sithen etliche tag kranck gewesen, aber in den krenckden allen nehe zu bedde gelegen.

 

Als anno 1570 den 7 augusti Anna, keiser Maximiliani secundi dochter hie zu Coln anquam, hin ab zu dem koninck Philippo von Hispanien zu faren, deß hausfrau sie werden sult, hat er sie gesehen und irer hoffjonckern bei sich zum Roich in der herbergen gehat.

 

Anno 1571 den 6 febrvarii ist sin steifdochter Elisabet Roß an Wymmar Hack, einen widman bestat worden und ir mitgeben 700 dall. heilichs gut an zweien rentbreffen. Vorhin war Henrich Roß, sin steifson auch an Feigin Schelt bestat, der auch fast gekost, und bei Herman und siner hausfrawen zum Roich wonten, also daß eitz die renth geringer wart. Und prospereirten die kinder nit wol, daß auch ein liden war, das der abzoch deglichs groisser wart. Do hetten sie beide den deinst under dem Rhaidthauß neit verzeihen, wan er noch vorhanden gewesen, aber es war zu spade. Sagten, der hat der halt.

 

Diß jar 18 julii hat er sin funf heussergin in der Klappergassen Wilhem Waltneil und Petersen eluden vor 5 dall. erblich außgethain. Und disse 5 dall. fhar Engin und dem conuent erblich zubetirmpt.

 

Das hauß zum Thorn am Buchel war zur Bach zu am heimlichen gemach under graben, daß es neder bestonde zu sincken. Daß hat er beleiten laissen und hatzs underfangen. Johan Helman hat im die kosten zum theil moissen bezaln.

 

Den 9 octob. hat er sin banneressen zum Roich gehalten, hat in wol 40 daller gekost.

 

Uff sant thomastag ist er uff dem Swartznhus zum sexsten deß rhaitz erwelt und zum drittenzum urthelßmeister, und commissario. [28]

 

Anno 1572 den 28 augusti ist er neben her Liskirchen und h. Geil uff den westphelischen kreitztag als ein verordneter zu Minrebroderngewesen in Coln. Dar quam zeitung vom bischof von Lutgin, wie uff der parisischn bruloft deß konincks von Naverra mit des konincks Caroli von Franckrichs swester vil tausent menschen jonck und alt neben den amiraln schentlich weren ermort, spolieirt, und verfolgt den 24 augusti.

 

Den 27 decemb. hat er ein schoin glasfinster sant Jacob under dem gewolf beider gerkamern setzn laissen.

 

Wie er diß jar auß zu rhade gesessen und deß abgestanden, ist er uff christabendt zum rheinmeister und richter in der weinscholen zum eirsten erwelt. Jaspar Kannegeisser war sin gesel der folgens burgermeister wart.

 

Anno 1573 prima maii ist Drutgin Bars, sin zweite hausfrawe am wasser im hauß zum Roich an dem Maltzbuchel gestorben, und zu s. Laurentz vor sant annen altar in irer eltern grab bei Wilhm Roß, iren vorigen man begraben. Got sie ir gnedich und allen gutten frunden.

 

Dieweil er mit siner nachfrawen kein testament irß gefallens uffgericht noch leibserben gezilt, so ist wegen der heiratzverschribung mit sinen kindern allerlei irthumb untstanden, das sie diß jar auß samen gehandlet, getaget und mitlen vergiblich vorgesclagen.

 

Dissen somer hat er Cronenberch an der Hoeportzn laissen reparern und abstrichen. Und wie daß inuentarium siner hausfrawen gutter vorhin uff gericht, eitz probeirt und waß mangelt uffgezeignet, ist er den 17 septemb. auß dem Roich zu Cronenberch gezogen wonen und mit siner mottern zu Weinsberch dischs samen gehalten.

 

Wie diß jar die leuben boven beiden gewolbern s. Jacob gerust und die orgel gesatzst, hat er vur sich und sinen fatter oben bei s. Hupertz capellen auch sinen broder und suster bewecht, schoin glasfinster dar zu geben, wie da zu ersehen ist.

 

Anno 1574, wie er diß jar zu Cronenberch sin studerium und leger hat und mit siner motter hauß hilte, sin suster Sibill, sinß broder Christians kinder und sin deinst jonge sin geselschaft waren, und im allerlei heiligen vorquamen widwen und jonfern, der irthumb mit sinen steifkindern noch swebte, hat er auß allerlei ursachn den widwe stait sich gefallen laissen, und in kein bestetniß verstain willen, deß er sich bei jedem also erkleret und bei jedem sin nahe alter causeirt und vorgewant. Es mogt dem hauß Weinsberch und siner fruntschaft da dur desthe baß gedienet werden.

 

Umb joannis mitzsomers hat er bloit gespouwen und etwaß swimels gehat, wost die ursach nit, obß fillicht von vil lesen komen, dan er in 3 monat linium gar auß und ander mehe geschicht gelesen. Auch allen irthumb sim steif son Wilhelmo Roß uff Padvam und Rom geschriben und sinen bericht den steifkindern schriftlich dargethain, mit allen rechnongen der wein deß abgeloisten und angelachten geldes. Daß seir vil kopbrechens nam. [28']

 

In dissem jar hat er mit willen sines broders sinen suestern zu gut zu irer leibzucht und iren kindern so lang die leste von in drien, Marien, Catharinen, und Sibillen lebt, sein codicil mit eigner handt uffgericht und in die gmein kist gelacht, umb bessere fruntschaft under in allen zu halten.

 

Gegen diß christmissen ist er zum sievenden mail deß rhaitz von deß Swartzen hauß geselschaft erwelt und im rhade zum veirthen urthelßmeister und commissarius worden, do er zu Cronenberch und Weinsberch gewont, doch er und wer mit im zu handlen zu Cronenberch viß und ingangen.

 

Anno 1575 den 11 marcii ist durch etliche verordente herrn Liskirchen, Suderman, Ryndorf, Questenberch uff supplicerndt anhalten siner steifkindern ein vertrag zwischen innen und im uffgericht. Daß er gegen sin tusent goltgl. leibzucht gegen daß gefordert kindtheil, gewin und vererhung haben sult daß gemein Wolfgut zu Swartzem allein, darzu noch 800 daller und waß zu Zulch were und außstunde. Im het wol mehe geburt, aber groissern unrade zu verhutten solden ers und machts ein ende.

 

Den 13 maii war er zu augustinern uff eim tag gegen hornß frawen kranck, zittern und biffen, daß er vom disch uffstond, zu hauß uffs bedde ligen ginge, stalt sich an wie ein feber, daß wasser im vrinal ferbte daß doich wie persilien farb. Colnbergh medicus judiceirte, es were der leber gebrech. Leiß im die leber ader sclain und hart purgeren, der mage halß und mondt war im ubelgestalt, binnen 14 tagen wart es besser. Er hiltzs, es were im von kelten und vil essen komen, dan er aß vil und begerlich fillicht uber sinß alterß vermogen,

 

Am 31 maii hat er in stat der 5 mald. roggen jarlichs und allen achterstendigen pensionen und unkosten zu Zulche mit Johan Borggart und Henrich von Geller daselbst ein newe rechnung, vertrag, kauff und verschribung von acht malder roggen jarlicher renthen mit 200 goltgl. zu losen uffgricht, doch jeder jar bin 4 wechen mit 10 goltgl. die pension zu bezaln termino prima maij, inhalt breif und siegell.

 

Uff den 13. junii ist im sin liebe motter Sophia Korth alterß und swacheit halber in got abgestorben ires alters von 77 jaren, do sie bei 26 jar nach sinem seligen fatter widwe gesessen, alle ire uberige kinder bestat hat, und eitz ein reuwich alter im hauß Weinsberch foirte. Ist zu Carmeliten in s. Josephs capel bei iren haußwirt begraben. Ist ein seir gutte kinder motter und flissige haushaltersche gewest, die mit ehren und friden umbgewert ist. Ire patrimonium und inkompst beschirmpt aber mit dem gereiden an uberigem nit verlaissen, daß sie an bestetniß irer kinder gelacht, kein scholt verlassen. Ire kinder haben folgens stillich under sich ein inuentarium uffgericht und daß gereide gut und loißrent leiflich getheilt.

 

Als er nuhe widder durch absterben siner motter verstoret und noch nit untsclossen ware, sich zu bestatten, hat er sich mit sinem broder Gotschalcken und siner hausfrawen verglicht, daß er mit innen zu Weinsberch sult kost halten. Und im daß hauß Weinsberch 12 jar umb 30 dall. jarß helfen vermeden, und ist auß dem kluppel von der Hoeportzn dar in zehen wonen. Herman aber hat sin sclaffung, [29] viß und ingangh und sin wonungh und wesen zu Cronenberch gehat, und samen beide broder haben den 2 septemb. angefangen, gemeinen disch uff beider beilage und gutte regnong zu halten, im hauß Weinsberch sult kuch und disch sin. Dieweil ire suester Sibillainnen von irem man Eck ware, haben sie die bei sich behalten. Und Herman hat ir sin hauß zum Thorn uff dem Buchel ingeben, da ire wonong und gemach zu haben, daß sie inß hauß Weinsberch inwendich kont viß und in ghain, die Buchelß dhur versperret. Ires broders kinder haben sie noch bei sich behalten und schoelen laissen gain.

 

Er hat das sesthe theil am hauß Weinsberch mit sinem zubehoire, daß sesthe theil am haif zu Dormagen mit sinem zubehoire, daß veirthe theil van 20 dall. fharen uff Brunsberch und waß er am rentbreif van 25 dall. zu Andernach hat sim broder mit 5 dall. jarß beswirt. Sin anpart und sinß broder kinder anpart ingedoimß und haußraidtzs hat sin suster meistheils uff dem hauß zu Thorn.

 

Den 22 decemb. im schrin Petri zu sinden, daß er 13 rad. mr. und 5 rad. schillinck gruntfaren durch gunst Joannis Ercklenß an sich pracht, damit sie nit in frembde hende quemen und dan nit zu loesen weren. Dieweil er aber nit uberflussich bei gelde ware, hat er 2 rad.d den kirchmistern Jacobi mit 40 dall. zu loese disse gruntfhar besweirt.

 

Uff christmiß den abendt, wie er sineß rhaitgangs abgestande, ist er zum zweiten mail rheinmeister gegen daß konftich jar mit Johan Pastorn erwelt.

 

Anno 1576 den 26 janvarii hat sin swager Conradt Eck die halfscheidt (dar an Sophia Kort, sin motter zu schrein stunde) am hohen gericht stritpar gemacht, also das er etwaß neben sinen sustern und brodern dar an beregtiget ist, vil oder wenich, wie man befinden wirt.

 

Den 13. febrvarii ist widder etwaß swach worden, ist im mit zittern angangen, und hat sich seir ubergeben, ist doch balde in kurtzn tagen genesen, hat aber purgeirt.

 

Am 21 febrvarii ist er sampt sinen steifkindern am hohen gericht gewesen, da einer den andern verwart wie sie sich mitler zit verglicht. Und haben die Rossen erben im offentlich ufftragt und verzich gethain uber daß alich Wolfgut zu Swartzem. Item uber die 25 daller renth am zol Andernach. Item uber die 20 goltgl. renth zu Uda. Auch deß zu Zulch. Dargegen er und sie auff alle forderungen verzeihen. Inhalt breif und siegel da von uffgericht, der jeder parthie einen hat.

 

Den 5 aprilis er nach Neuß und Kempen sin abgezogen, da er etwas zu werben hat. Und sonderlich zu Uda uff Duckers hof gewesen, von wegen der 20 goltgl. zu Uda, die im zugetheilt waren, wegen achter stendiger pensionen, die er nit van Frantz Haisselt dan van Duckers witiben und erben wolt untf.. Doch gutten bescheit und noch gein gelt bequam, doch die underpfende besigtiget.

 

Dissen somer war im am hauß Kymnade hinden ein groiß schade gescheit. Da er wol 80 gl. cur. verbauwen moiste. [29']

 

Am 7 septemb. diß jar hat er sampt sinem broder irer nichten im Ham bei den steinen die heubinde uff dem werde under Neuß gelegen, gnant uff dem Schandert, vur einen alten daler jarlichs drie jar verpacht, wilche ire motter zu einer memorien uff allerhilligen tagh zu Carmeliten und im hauß Weinsberch zu halten verordnet hatte.

 

Anno 1577 den 22 janvarii ist er an ein drittentheil vonhalbschit zweier zinshusern uff der Bach gelegen, zur Hardefuyst genant, zum eigenthumb, doch zu behoif sineß broders und sustern Marien und Catharinen, die mit beigelacht, von Goddert zu Coblenß gegolten, damit Goddert van Ichendorpf desche gewisser drin mogt behalten werden, wie im im kauff deß landtzzu Dormagen zu gesagt war.

 

Den 30 julii ist er mit sineß broderß son Gotschalck uff dem Lantzelroderhaiffe bei Neuß gewest, da mit dem halfen understanden zu handlen, ob er nit mit foegen inß beseß und uffburren mogt komen, daß im lanckwilich am rechten wurde fallen, aber er hat nit willen gelucken. Es moiß dem rechten befollen sin, doch hat alleß erkundigt und besehen, waß nodich, auch kuntschaft mit den pachtern gemacht.

 

Sin suster Sibilla hat sich beclagt, sie kunth jars nit haben von irem patrimonio, daß sie umb werte. Derhalb hat sie im und siner suster Marien ire 5 dall. viß 20 dall. fharn an Brunsberch und ire 5 dall. am renthbreif zu Andernach erflich uberlaissen, also daß sie vor jeder 5 dall. erblich von innen 10 dall. zur leibzucht haben soll. Hie von sint drei papiren breiff, der jeder von in drien und erschriben uffgericht und jedem einer zugestalt ist.

 

Gegen christmiß ist er uff der gaffeln deß Swartzen hauß zum achten mal zu rhade gekoren, und im rhade zum funften urthelßmeister und commissarius gegen daß kunftich jar worden.

 

Anno 1578 uff fritag den 3 janvarii ist er in sin alterdomb getroden und seßzich jar alt worden. Hat uber dischs rhaitzwein und fisch und anderß zum besten geben. Wie er vil jar her sin natalicium diem uff dissen tag gehalten und mit sinem hausgesinde frolich gewesen. Bedanckt sich zum hoigsthen gegen got sinen herrn, der in biß herzu erhalten hat bei zemlicher ehren und leibßnoitturft vur schaden und ungemach behut. Und mach eitz mit dem mantvano wol sagen.

Ad senium veni stadium vitale cucurri.

Et fero iamdudum pro pugione rudem.

Rudis enim fuit virga qua pretor gladiatores sexagenarios ab eo munere eximebat, ne amplius gladiaturam exercerent, ideo pro libertate et fine pugnandi rudis accipitur.

 

De præsenti momento seu tpen.

Tandem de futuro etc..

 

Die stunde, der tag, das jare mines absterbensgeben und anzeigen den bescloß, damit dan sulche nit inß vergeß komen, beger und bidt den haußschriber und notarium, daß er sulches hinden an diß alterthombs boich schribe, wan daß beschein und auch uff min grab gehauwen, sol er vor diß sollicitatur einen goltgl. einß haben den ich im besetz und gebe.

Anno 1581 den 4 junii

Herm. Weinsbergh subs..

Notetur tempus obitus mei.

 

 

 

Was sich in den vorigen 60 jaren, als von anfank mines lebens bis uffs jar 78 verlittener miner geschichten und sachn zugetragen, dasselb ist nuhe hievorzum kurzsten angezeignet und wirt im gedenkboich miner jarenetwas weitleufiger befonden werden, und bin der zeit gewiss und sicher, dan sie ist daher gesclichen. Was aber hinforter und kunftiglich in meinem leben geschein wirt, davon sol in dissem boich folgen, wil davon schriben, so lang es gott dem allemegtigen gelieben wirt, und sulche folgende zeit ist aller dingen ungewiss. Aber ehe und zuvor ich von den folgenden jaren schriben werde, will ich von der gegenwortiger zeit, wie alle sachen hie disses ortz deinlich sin, etwas vermelden. So wirt man dan das preteritum, presens et futurum fein bei einandern finden. Nuhe ist das presens vorhanden und da man die gegenwortige zit will ansehen, ist die nit mehe dan ein augenblick lank, nihil enim de tempore habemus nisi nunc'. Dan nach einem augenblick komt das ander, so ist das eirst hinwech; also mit dem dritten, veirtn und so fortan; sunst komt der name der zit wol widder als jar, manat, tag, stunde, parschn, pfingsten, aber dieselbe verlaufene zit nimmer widder; das auch diss zit, als tag, monat, jar ist, kan wol noch etwas zitz pliben, das ein lenger dan das ander, vergeit doch dan alles. Derhalb will ich hie anzeignen, wie es im anfank diss jars1578 allenthalben mit mir, auch mit etlichen andern geschaffen ist, besonder dweil ich sessigjariger eiz volkomens alters sin, und will vor eirst mit der staturen und proportion meiner personen, leibs, angesigtes und glider anfahen, dieselben etwas beschriben, abmälen und contrafeiten.

Ich bin eitz ungeferlich drei colnische illen hoich oder lanck a vertice ad plantas, und bedunckt mich, ich sie in zweiundzwenzich jaren wol einen oder zwein fingerbreit kurtzer worden, ich halß fast dar vor, wil doch nit zu hart druff stain.

Ich bin dick im leib anderhalb ill ungeferlich, und bin in benanter zit wol ein halb firdel illen smaler, dorrer, und magerer worden dar auf daß gleublicher ist.

setz ich von der Colnischer illen, verhoffent, die sol nit in disser stat lichtlich verendert werden, wie in vil stetten und landen die illen, maissen, gewichter oft groisser, kleiner, langer und kurzer, swarer und lichter gemacht sin, wie mir wol kundich ist und filligt noch mehe geschin machsunst weiß ich nitz bestendichs mehe daß pleibt, da mit kunftich die quantiteit gewist mocht werden. Ich schatz eitz daß oberst bein in minem armen ein halb colnische ill lanck, min foiß ist etwan ein daven breit kortzer dan ein halb colnische ill. Ich schatz 20 doum breit vor ein ill, und 24 finger breit vor ein il colnisch. So vill vom bericht die quantitet, so vil moglich zu treffen. Und ist dar auß abzunemen, daß ich [30'] mittelmeisßiger lengden und dickten, nit zu kurtz noch lanck, zu smal oder dick gewesen umb diß seszigst jar. Vormails in adolescentia bin ich wol etwaß von fleiß volliger und mehe bei leibe gewesen.

 

Das heubt ist nit zu groiß noch zu klein, oben umbher zemlich ront, hat doch oben an dem orde da die plat pflegt zu stain ein klein hulde, machtz etwaß unglich hinden zu, ist etwaß stumpf spitzich, ist oben oder vor kaele und hinderwartz harich. Sin dickte ist eitz ein colnische ill ront umbher weit an dem orde, da man die krentz tragt. Hat binnen 22 jaren mines bedunckenß ein daum breit an der weite verlorenn, stain doch nit fast druff, daß daß bein auch scrumpen sult.

 

Das angesigt ist mit der stirnen und kinne nit aller anderhalb firdel colnischer illen langk, drei finger breit boven den augbraten anzumessen herabwartz. Und vor uber under der nasen von einem ohren zum andern anderhalb firdel und ein daum breit weit. Und wolt, das ichs wol abcontrafeiten mogt. Ist nit mager auch vormails nehe follich gewest, ist einferbich sonder alle flecken oder leinzeichen, mit swartz, roidt brun, gel, oder fale, dan sin principal ist leibfarbich weiß, wan ich warm sin ein kleinß nach der roethe durch auß, wan ich kalt sin durch auß bleich, hat uff den backennitzs verscheidens roethes, aber wan ich seir heiß gebadet oder gewandert, wirtzs umb zit noch roder und seir roith, auch zum theil, wan ich schamroit werde. Aber daß underste theil augesigts wirt eitz wenich bloiß gesehen umb deß bartharß willen, da mit es behangen ist. Doch under umb die augen sicgt man die unfollige backen zum theill. Und scheint daß angesigt nit urede saur oder heslich dan mehe frolich und angenem.

 

Die augenbraten sin nit fast groiß, sin eitz dickharich und swartzbrunfarbich, plege sie duck selbst mit der scheren zu kurtzen.

 

Die stirn ist nit vil uber drei fingerbreit hoich boven den augbraten ohn das kaele vorheubt, war vor drissich jaren nitz kale, und hangen eitz noch ein wenich zarte harlein glich vor uber die stirne. Sunst ist die stirn von einem sclaif zum anderen nit weit oder breidt, auch nit smal oder ront her for. Die stirn hat sonderliche kein runtzelen dan gar zarte enge ligende nit zu achten, und in kaltem wetter sullen sich under den aughen balder zarte runtzlen sehen laissen.

 

Die augen sin klein und klein augeeppel, und wie sie nit hoich her vor ligen, also ligen sie auch nit deipf im heubt. Daß weiß ist nit gar schoinfarbich mit rotem por in den wincklin, die ringlin in den epfeln sin eschfarbich inß bla, daß augen deckfelgin hat swartze, zarte, kurtze harlin, unden noch weniger.

 

 

Die naese ist wol gestalt, nit groiß noch grof dan zimlich small, mit sinen hovelgin zu beseithen fein abgezeignet, in der mitten ist ein wenich gehoefelt, ist vor ein wenich gespitzst nau ein erkentniß gespalten, geit under der stirnen wenich innerwartzs, und dar unden uff dem hovelin vorzu daß smaltzste nit ront dan plat.

 

Dermondt ist nit hoich oder weit noch groiß, doin in auch nit weit uff, die zende sin eitz seir ungelich und berost, die zong ist mitten mit ritzer von hitzden. Hab vormalß vil mangelß im monde, uff der zongen und im halß zu leiden, eitz zu zeiten auch daß mir die zong vißfirt. Die lippen sin nit groiß belder klein, sint eitz zur zit bleich roit. Die backen nit uffgeblasen noch ingesclagen.

 

Die ohren sin wol proportioneirt nit groiß, sin unden nit angewassen, wie ich an villen gesehen, dan haben unden bewegsame knobelin an.

 

Das kinne ist nit groiß noch breit dan klein und gar wenich gespalten. Wirt aber mit dem barde bedenckt, daß man noch kinne noch kinbacken sicht, sunst weren die kinbacken scharf und nit follich anzusehen.

 

Der halß ist ront umbher ein halb ill, ein halb firdel und ein daumbreit dick oder weit. Ist nit kurtzs noch lanck. Hat vor an ein spitz scharf vißstainde, wirt umb des bardtzs willen nit gesehen.

 

Das har ist zart, sclecht, und weich, nitzs gekruset, ist swartz moisfarbich, eitz zur zit mit greisen harlin vermengt, daß man doch daß greisse von ferne nit mirckt, sunst laiß ich eitz das har uber den kamp scheren, daß es ein daum breit am heubt kurtz ist, biß es langer wegst und hinden in den nacken geith. Oben uff dem heubt anderhalb handtbreidt sucht und gein har, dan es ist da kaele scheir der stirn glich uber die plat her. Kompt eitz kein schermesser an mich, noch an den nacken, noch an die backen.

 

Der bart ist mir langer und breidter dan das ganse angesigt, laiß in rawe herab binnen den ohren und oben dem monde langs die backen wassen, ist follich lanckharich, nit sonderlich krauß. Dheilt sich unden von einandern in zwen spitze, die ich doch etwaskurtze, under den ohren weist daß har nit so lang wie vor und under dem kinne. Der bart ist eitz nit einerlei farb, zu beseithen und vor scheir wie wolfsruckenfarb und moußfarb vermischt. Dar zwischen an jeder seithen die backen abe, oben an den backen etwaß brun und swartzich herab. Der kneffel under der naesen ist an der rechten seithen etwaß bruner, an der lincken waß greiser, den laiß ich waßen und weigst ein wenich uber die oberste lippen und hat kein lange zacken zu beseithen, die doch in den andern bart recken. Kurtz den kneffel nimmer mit der scheren, die lengsthe har kurtz ich unden, irren im kemmen.

 

Die haudt uber daß ganse leib ist weiß und zart scheir an allen orthen, und deß fleischs ist durch auß nit zu vil dran. Haudt und fleischs ist smidich und nit rawe, plach vormalß fetter, folliger, und saftiger zu sin dan eitzs.

 

Die scholtern mit dem nacken uber den rucken von eim armknochen mit dem andern sin ungeferlich ein il colnischs breit.

Die armen oben mit den knochen biß unden an daß gewerfe der hende ein ill und scheir ein firdel halb lanck, vor neigst der handt her umb ein firdel zwein daum breidt dick, am dicksten des armen scheir ein halb ill rontz umbher dick. Bin zimlich starck in den armen.

 

Daß borstbret ist nit hoich von borst, hat unden am halß mager knochen, ist vor gladt sonder einich har, aber under den armen steth etwaß harß, under dem borstbreth steit ein spitz beingin, gehet etwas her vor.

Der ruck hat etliche klein wartzen uff, under der linck scholtern ein groiß linzeichen von eim verwoisten sweren.

 

In den lenden und kneif ront umb daß leib bin ich eitz under dem gurtel umb gemessen dick umb her ein ill und anderhalb firdel colnischs. Plach vormails smaler zu sein do ich mich steiffer bant, dan zu disser zit.

 

Der bauch ist mir nehe zit wie auch eitz nit besonder hoich oder dick. Die hindern backen sin eitz nit vil mit fleischs besweirt. Der nabel steth glichs dem bauch de pudendis pudet dicere. Die kaitzs knochlin gingen hinden uber den rucken wie pater nosters korner.

 

Die bein oben binnen dem leib an biß an die foißenckel oder knochen sin funffirdel colnischer illen lanck. Daß dicke oben an den beinen fast klein harich ist veirdehalf firdel und ein daumen ront umbher dick. Die braden an den understen beinen ront umbher drittehalf firtel ein daumbreit dick. Daß smalste am underbein ront umbher ein halb il weniger zwein fingerbreidt dick. Also das es wolgestalte bein sin.

 

Die hende von den knochen biß vor an den finger nail spitz sin scheir underhalb firdel illen colnisch lanck. Die finger mehe dan ein halb firdel illen langk. Also daß es lange hende und lange finger und neil sin. Die finger neil sint einen fingerbreit lanck. Es sin auch die hende binnen und baussen zart, hende und finger smal vor spitzicher an den nelen. Oben sicht man zarte blae oderlin. Und an dem rechten daumen under dem hindersten glidt standt ein linzichn, war vorzitz mit eim ritswert dar gehauwen. Da bei man mich kennen mogt, wan ich verloren were.

Die foiß sint ein halbe colnische ill lanck weniger einen gutten daumbreite, und sol der lincke foiß ein kleins kurtzer sin. Der daum an den zehen haben groisse lang neil, der ander zehe am rechten foiß ist der aller lengste, wirt im schoin benaut, derhalb ich da ein elstern auge hab.

 

[32] So vil sie von meinem leib und glidern gesagt, wilch ert und stoff gewesen und widderumb werden wirt, nichtz ist darin zu roemen. Dieweil sich aber die leut in der alten frunde gemeils und contrafeitungen erfreuen und die gerne in der verwarsamheit behalten, so hab ich eiz die kosten bei dem maeler sparen willen und mich selbst mit der federen abcontrafeiten, und verhoff noch frunde nach minem absterben zu haben, den diss min beschribung eben so angenem wirt sin, als were ich mit farben abgemalet. Derhalb will ich auch noch mehe darzu toin, das kein maeler doin wurde, und schreiben von miner naturen, von sitten, gewonheiten, mangeln und gnaden, wie dan nachfolgt.

 

 

Wa ich ehemals etwas recht von den complexionen gelesen und verstanden, auch min natur selbst etwas gekant, so bedunkt mich, ich sin sanguinischer complexion gewesen, dan ich bin warm und feucht von naturen, gern froelich und lustich gewesen und kunt keinen swarmoit lang bei mir stat haben. Mit lankheit der zeit bin ich wol etwas verandert, als melancolischs worden, doch nit vil; colera und phlegma haben bei mir das wenigst stat gewonnen. In jongen tagen hab ich vil gebloit, bin seir schamhaft und lichtlich roit im angesigt worden. Hab gern freude gesehen und gehort, in geselschaften kurzweil verzalt, in gastereien gespreich und angeneim gewesen, keiner boissen mogten mir zu vil sin, mit singen, danzen, springen ist mir verholfen gewesen; die musick seir gefellich.

 

 

In den zeiten durch min gans leben sin groisse verenderongen in der religion untstanden, aber got hab lob und dank, das ich noch bei der alten catholischen religion, die min voreltern gehabt und bei miner naturlicher oberkeit verpliben, bin erhalten. Ich sehen aber, das allerlei in disser edlen stat Coln inreist und vil gutter leut anders von sinnen werden, dan ire eltern, frunde und oberkeit gewesen, das ich eiz scheir mitten drunden wonen. Ich hab auch vernomen, wie es in Dutzscher nation vorlangs oberhant genomen, in Engellant, Schotlant, Denmark, ja in kurzen jarrn in Frankrich, eiz in den Nederlanden, das ich mich allerlei besorg, die fremde neue religionen der Augspergscher confession, Calvinisten, Hugonisten, Gausereien sulten inreissen. In unserm haus Weinsberch haben wir eiz, die den Jesuiten anhengich sint, und gar widder die andern alle sint mit mehe eifer catholigschs. Ich wil bei dem alten pliben.