sachen sult geschriben haben, da syn schrifften gnoich van vnd
wil daß andern befollen laissen syn, Jch handlen vnd reden
eitz mit eûch alß myt mynem son der sterblich vnd vnsterb=
lich sol syn von wegen syner person sterblich synes amptzs alls
haûsfatter vnsterblich, jahe von mir, von eûch, von vnssen sache-
vnd heûßlichen sachen, verzelle eûch auch etwaß von frunde-
nachparn burgern vnd anderß waß ich weiß oder gehortt
hab alles vngefairt vnd frei, Befelle eûch fort diß boich vnd
alles jnhalt myneß Testamentz Codicils vnd Declarationboichs,
Noch hab ich eynen extract gemacht aûsser dem M: T: r5Cicerone
De Senectute Et ex Apophtechmatib{us} D: Erasmi Ro: Ausser etlichn
Poeten vnd andern authoribûs waß sie de Senectûte melden
sagen vnd halten, Dar aûsser jre eigentschafft vnd ampt
zû vernemen ist, da etliche es loben, etliche lastern etlich
gûtte leren geben wie man sich dar jn halten sol, Diß
Extract oder collectanea hab ich eilens vergadert vnd herzû
gesatzst, Der vrsachen vnd meinong dieweil myn alter
hie ist da von ich schriben wil, daß ich dan dar jn zû zei=
ten etwaß deinstlichst lesen moge vnd dar an gedencke-
mich darnach auch jn mynem leben etwaß regûlern kûnne
Jr vnd eyn ander der alt mach werden aûch dar dûrch eyn
anmanong haben moege daran zû dencken, Es were noch
wol mehe dar zû zûsetzen gewest oder ordentlicher, mich hat
aber deß vil nachsoichen vnd arbeitzs verdros<se>n, Wa es
die gelegenheit vnd zeit vergûnt so mogt es noch wol ge=
schein zu syner zit, Dem allem nach vilgeleibter haus
fatter vnd nachfolger zûr zit Habt jr gehoirt vnd gnog=
sam verstanden wa ich es jm vorigen Gedenckboich my=
ner .60. Jaren gelaissen, vnd waß vrsachen mich bewegt
diß ander Gedenckboich von mynem Gedenckboich mynß
Alterthombs vffzûrichten, Wie jch die herbkompst vnd
vrsprûnck vnsser vnd deß haûß vnd gesclechtz Weinsberch
hab vor anlaissen {Tilgung: lai; unterstrichen} gain, Dar vff myn leben su-marie
mit allen vmbsten laissen folgen, Auch den extract von
dem alterdhomb zû latin vergadert gesatzst, Vnd wil
nûhe jar vor jar myn alterdomb verfolgen so lang
myr daß von Got gestattet wirt, Vnd ist myn fleissich
bitt vnd beger an eûch jr wilt diß boich verwaren vnd
da ich es laissen vnd vffhoeren werde continûeren biß zu-
ende myneß lebens, Da jrß nit so bequeimlich doin kûnth
oder gern schribt so verschafft es dûrch eynen andern
der wol schriben kan, Wie ich eûch diß boich daß haûß
Weinsberch befilte vnd alles gûttzs zû vertraûwe, Vnd
sydt damit Gode von Hymmelrich weitherß <h>yn synen
fatterlichen allemechtigen schûtz schirm vnd verwarsam=
heit befollen, Datum zu Cronenberch vff der Hoeportzen
jn Coln. Anno d{omi}ni 1578. den 20. tag Janûarij. {verzierter Punkt}
Herman von Weinsbergh l: s¿ et subs
|
Liber
Iuventutis Liber
Senectutis Liber
Decrepitudinis
|